PAGAT E USHTARAKËVE, ÇFARË PARASHIKON VENDIMI I QEVERISË
Në bazë të parashikimit të qeverisë shqiptare për rritjen e pagave në disa sektorë të rëndësishëm, për vitin 2022, ministri i Mbrojtjes me shkresën nr. 56/3, datë 24.3.2022, ka paraqitur propozimin për ndryshimin e vendimit aktual të pagave të ushtarakëve aktivë të Forcave të Armatosura të Republikës së Shqipërisë, duke parashikuar një rritje të pagës bazë për gradë prej mesatarisht 30% për çdo gradë të tyre.
Për sa sipër, është përgatitur projektvendimi që po ju paraqesim për shqyrtim dhe miratimin “Për disa ndryshime në vendimin nr. 224, datë 21.3.2017, të Këshillit të Ministrave, “Për trajtimin me pagë dhe shtesa mbi pagë të ushtarakëve aktivë të Forcave të Armatosura të Republikës së Shqipërisë”, i ndryshuar”, projektvendim që propozon sa vijon:
Relacion shpjegues për projektvendimin “Për disa ndryshime në vendimin nr. 224, datë 21.3.2017, të Këshillit të ministrave, “Për trajtimin me pagë dhe shtesa mbi pagë të ushtarakëve aktivë të Forcave të Armatosura të Republikës së Shqipërisë”, i ndryshuar”
Rritjen e pagës bazë për gradë për ushtarakët aktivë të Forcave të Armatosura, e konkretisht në masën rreth: (i) 24% për gradën Gjeneral Lejtnant (Admiral); (ii) 23,5% për gradën Gjeneral Major (Nënadmiral) dhe; (iii) 30% për të gjitha gradat e tjera të kategorive oficerë, nënoficerë dhe ushtar-detarë;
Përcaktimin e masës së shtesës për kushte të veçanta pune e shërbimi 20 000 lekë në muaj, për punonjësit e personelit ushtarak aktiv akademik, në Akademinë e Forcave të Armatosura dhe për punonjësit e personelit ushtarak aktiv, në Njësinë e Mbrojtjes dhe Sigurisë Kibernetike. Nga ky propozim përfitojnë rreth 6 600 ushtarakë aktivë të Forcave të Armatosura.