Shehaj: Ministrja shkeli Kushtetutën, lidhje me biznesin
Xhaçka: Im shoq merret me biznes që në vitin 1991. E ka nisur si emigrant në Itali, pas 30 vitesh do bëjë një hotel me 5 yje në Jug
Deputeti i Pd-së, Agron Shehaj, u përplas dje në Kuvend me ministren e Jashtme, Olta Xhaçka, të cilën e akuzoi se ka shkelur ligjin për konfliktin e interesit, pasi burri i saj u shpall investitor strategjik nga qeveria.
Për deputetin e Pd-së, qeveria dhe ministrja ka shkelur Kushtetutën dhe përfitimi i pasurisë publike është bërë në kundërshtim me ligjin për konfliktin e pastër të interesit, pasi nuk duhet të kishte asnjë lidhje me biznesin. Nga ana e saj, ministrja e Jashtme iu përgjigj akuzave duke u shprehur se statusi i investitorit strategjik nuk është në konflikt interesi dhe në shkelje të Kushtetutës. Xhaçka argumentoi se burri i saj ka 31 vite në biznes dhe tani është kthyer të investojë në vend për ndërtimin e një hoteli me 5 yje. Sipas saj, përfitimi i vetëm është e drejta për të vendosur disa shezlonga në bregdet.
DEBATI
Agron Shehaj: Mblidhet një qeveri dhe merr një vendim për t’i dhënë favore publike një anëtari të kabinetit. Komiteti i Investimeve Strategjike vendosi statusin investitor strategjik të projektit “Drimadhes Likeshary Swit” me subjektin “AG TCT shpk”. A e dinte Edi Rama se po i falte plazhin publik për 30 vjet ministres? Familja Xhaçka ishte e vetëdijshme se përfitimet ishin në shkelje të Kushtetutës. Tani duhej gjetur rruga për të mashtruar ligjin, por pa hequr dorë nga afera. Më pas, për të mashtruar ligjin më 26 qershor 2021, familja ministrore krijon një kompani me një emër shumë të ngjashëm me emrin e kompanisë së saj, por këtë radhë jo në emër të bashkëshortit, por në emër të një personi tjetër shumë të afërt. Në 15 korrik, Rama ndryshoi vendimin e mëparshëm duke shtuar si investitor strategjik dhe përfitues kompaninë në pronësi të shtetases amerikane. Te kompania e re, pronare në letra është një shtetase amerikane 31 vjeçe, kapitali i vetëm i saj është bashkëjetesa me vëllain e ministres së Jashtme. Guximin për t’i kaluar në përdorim pronën publike ministres e pati vetëm kjo qeveri, në shkelje të hapur të Kushtetutës dhe pa asnjë frikë nga ligji. Kështu, në nenin 70, pika 3, në ligjin themeltar të Shqipërisë, thuhet e qartë se: “Deputetët nuk mund të kryejnë asnjë veprimtari përfituese që përfiton nga pasuria e shtetit ose pushtetit vendor dhe as të fitojnë pasuri të tyre”.
Olta Xhaçka: Nuk kam shkelur asnjë ligj, as unë, as bashkëshorti im, as qeveria, as Kryeministri e askush. Nuk jam në konflikt interesi as unë e askush. Që unë nuk jam në konflikt interesi, e thotë ligji, e ka thënë Gjykata Kushtetuese, e ka thënë ILDKPI. Gjykata Kushtetuese, e cila në asnjë moment nuk u ka ndaluar familjarëve të deputetëve apo ministrave të merren me biznes. Nuk ka asnjë favor. Nuk ka asnjë konflikt interesi, asnjë papajtueshmëri kushtetuese. Dhe nuk e di se çfarë të mendoj, nëse e gjithë kjo është produkt i injorancës, apo i dashakeqësisë. Besoj se është kjo e fundit, sepse duhet vërtet një injorancë monumentale mbi ligjin për të besuar vërtet këto akuza që keni kaq kohë që i përtypni si arrat në gojë.