Spiropali: Xhaçka s’ishte pjesë e vendimit të KIS
“Nuk ka konflikt interesi, s’mori pjesë në mbledhjen e qeverisë”
Ministrja për Marrëdhëniet me Parlamentin, Elisa Spiropali, mbrojti kolegen e saj në interpelancën e zhvilluar dje në Kuvend për statusin dhe rolin e saj në shpalljen e bashkëshortit të ministres së Jashtme si investitor strategjik. Në përgjigje të akuzave, Spiropali u shpreh se Xhaçka nuk ishte pjesë e Komisionit të Investimeve Strategjike, në atë vendimmarrje. “Për qartësimin tuaj, Xhaçka nuk është anëtare e KIS, si organi i vetëm vendimmarrës për dhënien e statusit të investitorit strategjik dhe, rrjedhimisht, nuk mund të jetë pjesë e vendimmarrjes se këtij organi, që përjashton qartazi përfshirjen e saj në gjendjen e konfliktit të interesit të dukshëm apo të mundshëm, pasi as kjo zyrtare e lartë dhe as institucioni që ajo drejton, nuk përfaqësohen
në asnjë mënyrë, qoftë të drejtpërdrejtë apo të tërthortë, në vendimmarrjen e KIS. Ndërsa sa i takon mbledhjes së Këshillit të Ministrave, ju bëj me dije se znj. Xhaçka, ministër për Europën dhe Punët e Jashtme, me shkresë zyrtare, përpara mbledhjes, ka njoftuar që të mos marrë pjesë në shqyrtimin dhe vendimmarrjen e këtij vendimi, për të garantuar paanshmërinë e anëtarëve të Këshillit të Ministrave. Heqja dorë nga vendimmarrja nëpërmjet shkresës së depozituar garanton respektimin e ligjit për parandalimin e konfliktit të interesit, por edhe të ligjit nr.9000/2003, ‘Për organizimin dhe funksionimin e Këshillit të Ministrave’ si dhe të Kodit Etik Ministror”, tha Spiropali përpara deputetëve. Më tej, ministrja sqaroi se: “Vendimi i Këshillit te Ministrave vjen si rrjedhojë e parashikimit ligjor të ligjit të investimeve strategjike, sipas të cilit, vendimet e Komitetit të Investimeve Strategjike janë vendime në parim dhe se ato shoqërohen me vendime të Këshillit të Ministrave, përmes të cilit realizohet miratimi përfundimtar, koordinatat e sakta, si dhe tarifa e përdorimit të brigjeve të detit dhe të zonës përkatëse të plazhit në funksion të realizimit të projektit investues strategjik”, duke mbrojtur edhe njëherë VKM-NË për dhënin e statusit të investitorit strategjik, burrit të ministres Olta Xhaçka.