Opozita rikthen protestat kundër qeverisë pas 6 muajsh “pushim”
Opozita që drejtohet nga Sali Berisha ka paralajmëruar se do të zbresë në shesh për të protestuar kundër qeverisë Rama. Demokratët rikthehen në protestë kundër maxhorancës pas një shkëputjeje 6mujore. Kujtojmë që protesta e fundit e thirrur nga Sali Berisha u zhvillua në dhjetor të vitit 2021. Në atë kohë, objekti kryesor i protestës ishte projekti i Ballkanit të Hapur, i iniciuar nga Kryeministri Rama, Presidenti i Serbisë, Aleksandër Vuçiç dhe ish-kryeministri i
Maqedonisë së Veriut, Zoran Zaev. Mbështetësit e Berishës u mblodhën pranë selisë së Pd-së në orën 15:30 për t’u nisur drejt Kryeministrisë e për të protestuar kundër takimit të “Ballkanit të Hapur” dhe korrupsionit me inceneratorët dhe ku protestuan për rreth një orë. Protestën e hapi ishdeputeti i Pd-së, Aldo Bumçi, i cili u shpreh se protestohet kundër projektit të “Ballkanit të Hapur” që, sipas tij, do të çimentojë regjime autoritare e do të legalizojë shitësit më të mëdhenj të të drejtave të njeriut të lirisë e të demokracisë. “Ata që bënë aleancë me krimin, që ndërtuan narkoshtetin në Europë, duan të paraqesin para botës sikur janë garantuesit e vlerave evropiane, paqes dhe stabilitetit në rajon. Ky është Ballkani”, tha ai më 20 dhjetor.