Nis gjuetia e abuzuesve me pronat e Tiranës, në sitë 9 regjistra
Dy ditë pasi u bë me dije se ka nisur një hetim kryesisht për masakrën me regjistrat e pronave, të denoncuar publikisht nga kreu i Kadastrës, Prokuroria e Tiranës ka nisur me mbledhjen e provave. Sipas të dhënave, Prokuroria e Tiranës ka nisur me sekuestrimin e listës së punonjësve që kanë pasur akses në regjistrat e pronësisë në Kadastrën e Tiranës. Sipas burimeve, ky hetim po ndiqet nga vetë kryeprokurori i komanduar i Tiranës, ndërkohë që sherri për këtë masakër me regjistrimin e pronave të disa fshatrave të Tiranës, ka zbritur edhe në Parlament. Kështu, hetimet për Kadastrën e Tiranës kanë nisur pas skandalit ku 2100 regjistra pronësie ishin të totalisht të dëmtuar. Pas denoncimit për abuzimet nga vetë kreu i Kadastrës, Artan Lame, prokuroria nisi hetimet për veprat penale “Shpërdorim detyre” dhe “Zhdukje e vjedhjeve të dokumenteve”.
Abuzimet më të mëdha janë bërë me pasuritë në zonat në zhvillim të kryeqytetit, si Farkë, Kashar, Yzberisht, Mëzez, Ndroq, Shëngjergj, Kamëz, Vorë, Bathore, Babrru etj. Për të shmangur presionet, Lame tha se ky raport i është dërguar Kryeministrisë dhe Ministrisë së Drejtësisë, ndërsa do të përgatitet një raporti i detajuar për Kadastrat e çdo qyteti. I njëjti skandal është konstatuar edhe në Kadastrën e Durrësit, ku shkrirja e saj dhe nisja e hetimeve të thelluara për abuzimet nxorën një raport me shkeljet, ku u vu re se abuzimet janë përtej imagjinatës dhe zonat ku janë kryer paligjshmëri dhe plaçkitjet më të mëdha janë ato bregdetare të Durrësit, si Plazh, Spitallë, Lalëz, Draç, Rodon etj. Në fakt, në këtë gjendje, të gjitha kadastrat e vendit dhe përgjegjësit vetëm dalin e denoncojnë në media, por nuk kryejnë padi pranë institucioneve përkatëse.