Goditet banda e hajdutëve në Tiranë, 4 të arrestuar Si u zbuluan dhe ku vepronin pjesëtarët e grupit

Katër të rinj kanë përfunduar në prangat e Policisë pasi akuzohen për vjedhje të shumta në Tiranë. Operacioni i koduar “Kompleksi”, çoi në pranga grupin e hajdutëve, të cilët dyshohen se, në bashkëpunim me njëritjetrin, kanë kryer vjedhje të ndryshme në një kompleks pallatesh, në zonën e Unazës së Re. “Shërbimet e Komisariatit të Policisë Nr. 6, në vijim të punës për parandalimin e vjedhjeve, zbardhjen e atyre të ndodhura më parë dhe vënien e autorëve para përgjegjësisë ligjore, pas një pune të mirëfilltë hetimore, organizuan dhe finalizuan me sukses operacionin ‘Kompleksi’,

në kuadër të të cilit u vunë në pranga shtetasit L. Z., 23 vjeç; M. M., 21 vjeç; E. M., 22 vjeç dhe I. Xh., 21 vjeç, për veprën penale “Vjedhja” e kryer në bashkëpunim. Gjithashtu, u procedua penalisht në gjendje të

lirë shtetasi K. V., 17 vjeç, banues në Tiranë dhe u shpall në kërkim shtetasi J. K., 31 vjeç, banues në Kavajë. Këta shtetas dyshohen se në bashkëpunim me njëri-tjetrin, kanë kryer vjedhje të ndryshme në një kompleks pallatesh, në

zonën e Unazës së Re. Nga veprimet hetimore dyshohet se shtetasit L. Z., M. M., E. M., I. Xh. dhe K. V., në rrugën “Nexho Konomi” kanë vjedhur sende të ndryshme në banesën e një shtetasi, si dhe automjetin e tij tip “BMW”, ndërsa shtetasi J. K. i ka ndihmuar autorët për të shitur automjetin e vjedhur. Gjithashtu, më datë 22.06.2022, po në rrugën “Nexho Konomi”, dyshohet se kanë vjedhur sendet personale në automjetin në pronësi të shtetasit L. M.

Në vijim të veprimeve u sekuestruan, në cilësinë e provës materiale, sendet e vjedhura”, sqaroi Policia. Forcat e rendit janë duke hetuar për të zbuluar përfshirjen e tyre edhe në vjedhje të tjera në kryeqytet.