“Në Shqipëri i besojnë Europës!”, Rama: Mos lini që ky besim të bjerret pa kthim
Kryeministri shqiptar, Edi Rama, gjatë fjalimit që mbajti në Këshillin e Europës nuk i kurseu kritikat për vendet e Be-së, të cilat sipas tij po mbahen peng nga Bullgaria, një vend anëtar i NATO-S. Kjo situatë sipas tij nuk është aspak e shëndetshme, pasi nuk mundet që BE të përdoret për të marrë peng vende të tjera. Kryeministri zbardhi fjalimin që mbajti dy ditë më parë në Këshillin Europian. Në fjalën tij, Edi Rama u ndal te besimi i lartë që kanë shqiptarët për Europën, ndërsa u ka kërkuar zyrtarëve të Besë që të mos lënë që ky besim të bjerret pa kthim. “Çfarë turpi për Europën kjo historia bullgare! Agresori rus i Ukrainës po merr një ndihmë tejet bujare dhe madje të pakërkuar nga një vend i NATO-S, i cili po destabilizon një tjetër vend të NATO-S, duke nxitur më shumë mllef e pakënaqësi në një rajon si i yni, që ende mund të mos jetë pjesë e Be-së, por mbetet një pjesë e Europës, ku sot Vladimir Putini sheh pikërisht hallkën e dobët për të goditur më tej rendin europian”, deklaroi Rama. Kryeministri shqiptar shprehu mbështetje ndaj propozimit të Presidentit francez, që në pamundësi të anëtarësimit të vendeve të Ballkanit
Perëndimor propozon një mekanizëm që e emëron si Komuniteti i ri Politik Europian. “Që Emanuel Makronit i duhet të përpëlitet midis shpirtit të tij tejet europian dhe kostumit presidencial të një vendi, ku të gjesh entuziazëm për zgjerimin e Be-së, është njësoj si të gjesh ujë në shkretëtirën e Arabisë Saudite, edhe ky është një sekret tejet publik. E megjithatë, ideja e tij për të na mbledhur të gjithëve së bashku, në një
Komunitet të ri Politik Europian, duket për momentin një recetë shumë më premtuese sesa pjata bosh e zgjerimit pa zgjerim, e cila na është servirur për vite të tëra me radhë”, deklaroi z.rama. Në këto kushte, Rama kërkoi pranimin nga të gjithë vendet e Be-së të Open Balkanit si një platformë që mban të bashkuar këtë rajon dhe prapëson çdo rrezik destabiliteti. “U bëj thirrje të gjithëve për ta mbështetur pa asnjë mëdyshje Ballkanin
e Hapur, nëse nuk doni që rajoni ynë të shkatërrohet sërish përpara syve tuaj, ndërkohë që hëpërhë nuk mund të ofroni asgjë më të mirë sesa karuseli i cirkut bullgar. Ballkani i Hapur është artikulimi më i pastër i ndjesisë sonë të përkatësisë në Europë”, u shpreh Edi Rama. Ai ishte kritik edhe për sa i përket mos mosliberalizimit të vizave për Kosovën. “Shpresoj shumë, po ashtu, që, ndërkohë që pengmarrja e Bullgarisë është ende në veprim, situata e dhimbshme e pengmarrjes së Kosovës të marrë fund dhe popullata e vetme në Europë pa të drejtë të lëvizë lirisht jashtë vendit të vet, të marrë liberalizimin e shumëmerituar të vizave”, theksoi Rama. Por ai nuk harroi që të vihen në pozitat e mikut të tij Aleksandër Vuçiçit kur i bëhet presion nga BE dhe u kujton europianëve rrezikun potencial që ekziston në një vend ku 80 për qind e popullatës është pro ruse. Të njëjtat pakënaqësi, Rama i shprehu dhe në një intervistë për “Corriere della Sera”, ku u shpreh se “të parashikosh lëvizjet e Be-së se kur do të anëtarësohet Shqipëria, është si të parashikosh fatkeqësi të mëdha natyrore”.