Kreu i ILD: Pavarësia e magjistratëve nuk duhet marrë si e mirëqenë
Kryeinspektori i Lartë i Drejtësisë, Artur Metani, tha dje se pavarësia e magjistratëve nuk duhet marrë si e mirëqenë. Gjatë një aktiviteti të organizuar nga ILD, Metani u shpreh se mbetet sfidë e të gjitha vendeve që të shtojnë përpjekjet për forcimin e kësaj pavarësie, por edhe rritja e efikasitetit dhe përgjegjshmërisë së organeve të sistemit të drejtësisë. “Me homologun tim rumun, z. Lucian Netoroju, ndamë të njëjtin qëndrim: pavarësisht dallimit dhe diversitetit të kulturave tona politike, juridike, sociale apo ekonomike, historia në Europë dhe jashtë saj po tregon se pavarësia e magjistratëve nuk duhet marrë si e mirëqenë, por mbetet një çështje që u përket të gjitha vendeve. Sot të gjitha vendet duhet të shtojnë përpjekjet për forcimin e kësaj pavarësie, por nga ana tjetër, edhe rritjen e efikasitetit dhe përgjegjshmërisë së organeve të sistemit të drejtësisë. Sa më i përgjegjshëm një magjistrat, aq më i garantuar është qytetari për të drejtat e veta. Sa më i pavarur magjistrati, aq me demokratikisht ecën shoqëria. Në këtë kuadër, gjetja e balancës midis interesit publik për administrimin e drejtësisë, nga një anë, dhe pavarësisë së magjistratëve, nga ana tjetër, mbetet një sfidë permanente, sepse pavarësia e magjistratëve dhe përgjegjshmëria e tyre, janë vlera dinamike. Zhvillimet shoqërore
sjellin padyshim edhe transformime shoqërore dhe ekonomike dhe raporti pavarësi-përgjegjshmëri mbetet përherë sfidë profesionale dhe institucionale. Drejtësia ka kontributin e vet në jetën dhe cilësinë e çdo shoqërie. Krijimi apo konsolidimi i shtetit të së drejtës nuk është një proces i lehtë. Në çdo vend, ky është një proces dinamik dhe në evoluim të vazhdueshëm për gjetjen e mekanizmave të duhur, të cilat sigurojnë respektimin e një sërë standardesh apo vlerash për një sistem drejtësie efikas, të përgjegjshëm dhe të pavarur. Shqipëria ka kryer një reformë të thellë ligjore dhe institucionale në sistemin e drejtësisë”, tha Metani.