NIKOLLA: SOT FIJET E KORRUPSIONIT DHE VARËSISË NGA POLITIKA JANË KËPUTUR
Kryetarja e Kuvendit, Lindita Nikolla, thotë se pandëshkueshmëria e të korruptuarve është një mit që është rrëzuar në vitet e fundit dhe se sistemi i drejtësisë në Shqipëri është forcuar dhe konsoliduar si një pushtet i pavarur. “Një prej miteve ishte mbretërimi i pandëshkueshmërisë që dukej se ishte shndërruar në një antikulturë të sistemit të drejtësisë. Sot askush nuk është mbi të drejtën dhe drejtësinë dhe askush nuk mund t’i shpëtojë ndëshkimit nëse e meriton. Sistemit po i zihej fryma nga monopoli i një kaste drejtuesish, gjyqtarë e prokurorë të korruptuar me mbështetjen e një kaste politikanësh gjithashtu të korruptuar. Politika e drejtësia po sundonin bashkërisht me forma despotike. Sot pavarësia reale e gjyqtarëve e prokurorëve po konsolidohet paralel me varësinë e tyre prej Kushtetutës, ligjeve. Sot fijet që e lidhin sistemin me format korruptive janë këputur. Pushteti gjyqësor po fuqizohet si një pushtet i pavarur”, tha Nikolla.