Qeveria rikthen amnistinë fiskale, deklarim vullnetar deri në 2 milionë euro
Kategoritë që përjashtohen nga nisma, e cila u kontestua nga FMN Amnistia do të zgjasë 9 muaj, tatimi i aplikuar do të jetë deri në 10 për qind. Do legalizohen edhe pasuritë jashtë vendit
Qeveria rikthen amnistinë fiskale e penale, pavarësisht mosdakordësisë së shprehur hapur nga Fondi Monetar Ndërkombëtar dhe zërave kundër se përmes saj mund t’i çelet rruga legalizimit të pasurive që vijnë nga bota e krimit apo trafikut. Dy vite nga prezantimi i draftit paraprak, është hedhur për konsultim një variant i përpunuar, në të cilin është përcaktuar shuma tavan që mund të deklarohet vullnetarisht, mënyra sesi do të bëhet kjo, kategoritë që do të përjashtohen si edhe taksat që do të aplikohen.
NISMA
Pas zyrtarizimit të nismës, qytetarët do të mund të deklarojnë të ardhurat deri në 2 milionë euro. Ky është tavani që qeveria ka vendosur. Nëse deklarimi bëhet brenda 4 muajve të parë nga hyrja në fuqi e ligjit, tatimi që do të paguhet do të jetë 7 për qind, ndërsa nëse bëhet pas këtij harku kohor, atëherë tatimi do të jetë 10 për qind. Konkretisht, nëse qytetarët deklarojnë 12 milionë lekë, atëherë detyrimi tatimor është 840 mijë lekë nëse deklarimi bëhet në 4-mujorin e parë dhe 1.2 milionë lekë nëse deklarimi bëhet pas 4 muajsh nga hyrja në fuqi e ligjit. “Deklarimi vullnetar i pasurive apo i pasqyrave financiare kryhet pranë Njësisë Speciale, nëpërmjet paraqitjes së një vetëdeklarimi sipas formularit të deklarimit vullnetar. Njësia, brenda 5 ditëve pune nga depozitimi i formularit të deklarimit vullnetar, kryen verifikimet paraprake nëse aplikuesi është subjekt përfitues i këtij dhe pajis subjektin ose përfaqësuesin e tij me një dublikat të formularit të vetëdeklarimit të certifikuar/nënshkruar nga Njësia. Shumat në të holla depozitohen në llogari bankare të bankave të nivelit të dytë, ndërsa për pasuritë e tjera, të detyrueshme për t’u regjistruar, ndiqen procedurat e
regjistrimit sipas parashikimeve të legjislacionit përkatës të fushës. Deklarimet dhe veprimet e kryera në kuadër të kësaj procedure nga ana e subjekteve përfituese, sipas këtij ligji, në lidhje me llojin dhe vlerën e pasurisë që deklarojnë vullnetarisht në formularin përkatës, nuk shërbejnë si indicie apo provë për ndjekjen apo procedimin penal dhe/ose administrativ të subjekteve përfituese”, thuhet në ligj.
PASURITË JASHTË VENDIT
Por amnistia shkon edhe përtej kufijve, pasi
qytetarët mund të deklarojnë vullnetarisht edhe pasuritë që ndodhen jashtë territorit të Shqipërisë. “Pasuritë e deklaruara vullnetarisht, që ndodhen jashtë territorit të Republikës së Shqipërisë, mund të legalizohen me pagimin e tatimit të posaçëm, pasuritë e legalizuara në këtë mënyrë mund të përdoren dhe administrohen lirisht sipas parashikimeve të legjislacionit përkatës. Për legalizimin e pasurive, subjektet e këtij ligji, personalisht apo nëpërmjet përfaqësuesve të tyre,
plotësojnë formularin për deklarimin vullnetar të pasurive dhe e paraqesin këtë deklarim në autoritetet përgjegjëse doganore kufitare për kryerjen e procedurave doganore, sipas legjislacionit në fuqi. Deklarimet dhe veprimet e kryera në kuadër të legalizimit të pasurive nga ana e subjekteve përfituese, sipas këtij ligji, në lidhje me llojin dhe vlerën e pasurisë që deklarojnë vullnetarisht në formularin përkatës, nuk shërbejnë si indicie apo provë për ndjekjen apo procedimin penal dhe/ose administrativ të këtyre subjekteve”, theksohet më tej në draft.
KATEGORITË
Nga kjo nismë mund të përfitojnë emigratët, ata që kanë punuar deri më sot në të zezë, si edhe sipërmarrësit vendas. Nga ana tjetër përjashtohen të gjithë ata që i kanë të ardhurat e tyre nga krimi. Ashtu sikundër janë të paaministueshme të ardhurat e politikanëve dhe të rrethit të tyre familjar, të gjykatësve, prokurorëve dhe të rrethit të tyre familjar, të punonjësve të Policisë dhe të rrethit të tyre familjar, si dhe të gjithë atyre drejtues të shtetit që janë subjekt i deklarimit të pasurive. Për këto kategori, siç është bërë më herët e ditur, nuk ka amnisti dhe paratë apo asetet e tyre nuk mundet të legalizohen nëse vijnë nga veprimtaria e paligjshme. Amnistia do të zgjasë 9 muaj dhe në përfundim të saj çdo para dhe çdo aset që është jashtë sistemit të formalizuar, konsiderohet para kriminale dhe aset kriminal dhe trajtohet njësoj si paratë dhe asetet e krimit.