Avokatët kundër hartës gjyqësore, protestat vijojnë deri të premten
Ministria e Drejtësisë nuk ka ndërmend të tërhiqet nga drafti i hartës së re zgjedhore, ndërkohë që protesta e avokatëve do të vazhdojë deri ditën e premte. Në javën e tretë të bojkotit të seancave nga ana e avokatëve, Ministria e Drejtësisë nuk ka bërë asnjë hap pas për t’u tërhequr nga miratimi i hartës së re gjyqësore që i shkurton vendit 18 gjykata, duke lënë një sërë qytetesh të mëdha pa institucione të tilla. Edhe këtë javë, protesta e avokatëve do të vazhdojë. Kështu, avokatët e Gjirokastrës dhe ata të Lezhës thanë se do të bojkotojnë seanca gjyqësore për sa kohë institucionet përkatëse nuk kanë pasur asnjë reagim për kërkesat e tyre. Ndërkohë që dje, edhe Këshilli i Lartë i Prokurorisë shprehu mbështetjen për hartën e re gjyqësore të propozuar nga KLGJ-JA dhe Md-ja. KLP-JA sot do t’i përcjellë zyrtarisht Ministrisë së Drejtësisë mendimin për hartën e re gjyqësore. “Këshilli i Lartë i Prokurorisë u shpreh pro hartës së re gjyqësore të propozuar nga KLGJ-MD. Kjo hartë në mënyrën si do kompozohet, nuk bie ndesh me interesat e sistemit të Prokurorisë, i cili funksionon pranë gjykatave. Nesër, mendimi
i KLP-SË do t’i përcillet zyrtarisht Ministrisë së Drejtësisë. Edhe prokurori i Përgjithshëm është shprehur pro këtij projekti. Tani pritet dhe mendimi i Ministrisë së Financave për të analizuar faturën financiare dhe projekti do t’i kalojë për miratim Këshillit të Ministrave. KLGJJA ka detyrimin ta rishohë në çdo 5 vjet hartën për t’ia përshtatur kompozimin e saj, interesave të sistemit gjyqësor. Prokuroritë e Apeleve që bashkohen në Tiranë, parashikohet t’i nënshtrohen këtij procesi pas 6 muajsh,
prokuroritë e Shkallës së Parë pas 9 muajsh, kohë kjo e mjaftueshme për të marrë masa organizative infrastrukturore nga prokurori i Përgjithshëm dhe të kryhet transferimi i prokurorëve nga ana e KLPSË”, thuhet në njoftimin e KLPSË. Institucioni i Këshillit të Lartë të Prokurorisë preket direkt nga harta e re gjyqësore, pasi 9 prokurori në rrethe dhe 5 prokurori Apeli rrezikojnë të shkrihen. Këshilli i Lartë Gjyqësor prezantoi hartën e re gjyqësore më 28 dhjetor të vitit të shkuar, ku parashikohet që në të gjithë vendin të ketë 12 gjykata të Shkallës së Parë, një gjykatë Apeli dhe dy gjykata Administrative të Shkallës së Parë. Kjo nismë u ndërmor për shkak të kolapsit në gjykata si pasojë e procesit të vetingut. Ndërkohë, Gjykata e Matit do i bashkohet Dibrës; gjykatat e Kavajës dhe Krujës do t’i bashkohen Durrësit; Gjykata e Lushnjës do të shkojë në Fier; Gjykatës së Gjirokastrës do t’i bashkohen gjykatat e Sarandës dhe Përmetit; Tropoja do bashkohet me Gjykatën e Kukësit; Pogradeci me Gjykatën e Korçës; Kurbini do t’i bashkohet Gjykatës së Lezhës dhe Gjykata e Pukës do të bëhet pjesë e Gjykatës së Shkodrës. Ndërkohë, do të ketë vetëm dy Gjykata Administrative, një në Tiranë që mbulon veriun dhe tjetra në Lushnje që mbulon Jugun, ndërsa Apeli Administrativ do të jetë një e vetme në kryeqytet. KLPJA është institucioni i parafundit që do të japë mendimin në Ministrinë e Drejtësisë. Më pas, është Ministria e Financave që do të bëjë një përllogaritje të shpenzimeve dhe kjo hartë pritet t’i kalojë qeverisë për miratim.