Covid-19 në rritje, shënohet viktima e parë pas dy muajsh
Nënvarianti i “Omicron BA5” pushton vendin, rikthehen rastet e vdekjeve Ministria: “Humb jetën nga Covid-19 një 72-vjeçar i pavaksinuar”. Manastirliu: “Pritet rritje e rasteve. Vaksinimi, fjala kyçe”
Ditën e djeshme u shënua viktima e parë e Covid pas thuajse dy muajsh. Ishte harruar dita kur infektimet numëroheshin me qindra e fatalitetet për shkak të Covid-19, por duket se periudha e qetë ka përfunduar duke i lënë vendin një vale të re. Një e katërta e të testuarve ose gati 30% rezultojnë pozitivë, rritje e reflektuar edhe në spitalet gati të boshatisura. Prej 9 majit, kur u shënua viktima e fundit për shkak të Covid-19, dje u regjistrua fataliteti i radhës pas thuajse dy muajsh.
SITUATA
Në buletinin e radhës, Ministria e Shëndetësisë bën me dije se një 72-vjeçar i pavaksinuar humbi betejën me Covid, ndërkohë që mbi 100 të tjerë e kapërcyen. “Janë kryer 366 testime, nga të cilat kanë rezultuar pozitivë me COVID-19, 90 qytetarë, në këto bashki: 59 në Tiranë, nga 5 qytetarë në Kavajë, Divjakë, Gramsh, nga 3 qytetarë në Patos, Vlorë, Kolonjë, nga 2 qytetarë në Durrës, Lushnje, nga 1 qytetar në Mirditë, Fier, Gjirokastër. Janë 1,825 qytetarë aktivë me Covid-19 në gjithë vendin. Aktualisht, në spitalin COVID 3 po marrin trajtim 17 pacientë. Në 24 orët e fundit ka një humbje jete me Sars-cov2: një qytetar nga Tirana, 72 vjeç, i pavaksinuar. Janë shëruar 104 qytetarë gjatë 24 orëve të fundit, duke e çuar numrin e të shëruarve në 273,844 që nga fillimi i epidemisë”, citohet në njoftimin nisur për mediat, ku nuk harrohet apeli për t’u vaksinuar, të moshuar e fëmijë. Nisur nga rritja e numrit të qytetarëve të prekur nga Covid-19, Ministria e Shëndetësisë u bën sërish thirrje qytetarëve të mos neglizhojnë vaksinimin anti-covid, posaçërisht në këtë periudhë të rritjes së kontakteve, për shkak të lëvizjeve përgjatë sezonit veror. “Çdo person mbi 12 vjeç, mund të vaksinohet në qendrat shëndetësore në të gjithë vendin. Gjithashtu MSHMS apelon të gjithë qytetarët e vaksinuar, që të drejtohen në qendrat shëndetësore, për t’u vaksinuar me dozën përforcuese. Vaksinat ANTI-COVID reduktojnë
mundësinë e infektimit dhe shmangin në shkallë te lartë hospitalizimet dhe fatalitetet. Nëse keni shenja të sëmundjes apo keni pasur kontakt me një person të prekur nga Covid-19, izolohuni menjëherë dhe kontaktoni mjekun tuaj të familjes për t’u testuar sa më parë ose telefononi Urgjencën Kombëtare në numrin unik 127", nënvizohet në buletinin ditor.
MINISTRJA
Nga Instituti i Shëndetit Publik, ministrja e Shëndetësisë tha se vjeshta mund të sjellë variante të reja të virusit pandemik, ndaj apeloi për vaksinim. “Ashtu sikurse edhe Organizata Botërore e Shëndetësisë ka alertuar, do të kemi edhe një rritje të rasteve. Vjeshta sigurisht që do të vijojë që të ketë sfidat e saj në raport edhe me rastet Covid, në raport edhe me variantet e reja. Por vaksinimi është fjala kyçe. Ne do të vijojmë procesin e vaksinimit”, deklaroi Manastirliu.
“Omicron”, varianti më i fundit i Covid-19 që po qarkullon prej dy vitesh në botë, vijon të pësojë mutacione, duke nxjerrë lloje të reja në qarkullim. Pas nënvariantit “BA2” që qarkulloi në dimër e deri më tani kanë qarkulluar disa variante, ku më i fundit është “BA5”.