Berisha: Gjendja në Spitalin e Kukësit, alarmante

Ndërsa publikon pamjet nga fshati Shtiqën ku në çezma del ujë i ndotur, ish-kryeministri, Sali Berisha, e konsideron alarmante gjendjen në Kukës. Berisha denoncon heshtjen sipas tij të institucioneve përgjegjëse. “Nga informacionet e marra nga mjekë dhe infermierë, si dhe gazetarë kurajozë, prej tri ditësh Spitali Rajonal i Kukësit ka qenë i mbingarkuar me pacientë të shumtë nga qyteti i Kukësit dhe fshatrat e rrafshës kryesisht Shtiqën, pacientë që kanë shfaqur shenja helmimi apo infeksione gastrointestinale, reflektuar me dhimbje të forta barku, të vjella dhe diarre. Pacientët e shumtë të ardhur kryesisht nga familje të njëjta kanë marrë mjekime si në spitalet e luftës. Ajo që të bën përshtypje në këtë ngjarje është heshtja, terri informativ dhe përpjekja e qeverisë për ta minimizuar këtë problem”, thotë ai. Berisha shton se numri i pacientëve është disa qindra, ndërsa deklaron se shkaku dyshohet të jetë uji i pijshëm. “Nisur nga të dhënat specifike dhe mendimi i mjekëve kurues, këto të sëmurë duken se e kanë marrë shkaktarin infektiv nga uji i pijshëm, por pavarësisht kësaj po punohet në mënyrë djallëzore për ta trajtuar si virozë sezonale. Ajo që të bie në sy është, pamundësia e mjekëve për të dhënë shërbim normal dhe dinjitoz për të sëmurët. Reformat e qeverisë Rama kanë shkatërruar edhe shërbimin spitalor në Kukës. Ka mbi tre vjet që Spitali Rajonal Kukës ka funksionuar si spital lufte ku falë këtyre kushteve kanë ndodhur çmenduri që nuk i kishte parë asnjëherë personeli i këtij spitali dhe për pasojë, është reflektuar në mungesën e dhënies së shërbimit mjekësorë banorëve të këtyre zonave qoftë në aspektin sasior qoftë atë cilësor”, shton ai.