13 të vdekur dhe 50 të plagosur nga sulmi ajror në Kremenchuk
Në qendër tregtare në Ukrainën lindore kishte me më shumë se 1000 njerëz Kryeministri Johnson: Sulmi në qendrën tregtare në Ukrainë tregon shkallën e mizorisë dhe barbarizmit të Putinit
Trembëdhjetë persona kanë vdekur dhe 50 të tjerë u plagosën dje pas sulmit ajror në një qendër tregtare në Kremenchuk, në Ukrainë qendrore, tha Kyrylo Tymoshenko, nënkryetar i Zyrës së Presidentit të Ukrainës.
Nga 50 personat e plagosur, nëntë janë në gjendje të rëndë, shtoi ai. Raportet fillestare nga Presidenti Volodymyr Zelenskyy tregonin se të paktën 1,000 njerëz mund të kenë qenë në ndërtesë kur u godit. Ajo nuk përbënte asnjë kërcënim për ushtrinë ruse, asnjë vlerë strategjike, njerëzit donin vetëm të jetonin një jetë normale, gjë që i zemëron aq shumë pushtuesit. “Nga pafuqia, Rusia vazhdon të godasë njerëzit e zakonshëm. Është e kotë të presësh qe rusët të jenë të arsyeshëm apo njerëzorë”, tha Zelenskyy. Ndërsa Kryeministri britanik, Boris Johnson, tha se sulmi në qendrën tregtare në qytetin Kremenchuk tregoi “thellësinë e mizorisë dhe barbarizmit” në të cilin është zhytur Presidenti rus, Vladimir Putin. “Edhe një herë mendimet tona janë me familjet e viktimave të pafajshme në Ukrainë. Putini duhet të kuptojë se sjellja e tij nuk do të bëjë gjë tjetër veçse të forcojë vendosmërinë e Ukrainës dhe të çdo vendi tjetër të G7 për të qëndruar pranë Ukrainës për aq kohë sa duhet”, tha Kryeministri britanik. Ndërkohë, të paktën tre persona u vranë dhe 15 u plagosën nga bombardimet e reja nga forcat ruse në periferi të Kharkivit, thanë autoritetet ukrainase. Sipas zyrës së kryetarit dhe administratës rajo
nale, artileria ruse goditi North Saltivka, një zonë banimi në skajet verilindore të qytetit. Zyrtarët thonë se numri i të vdekurve dhe numri i të plagosurve pritet të rritet. Ndërkohë, gjatë një vizite në kryeqytetin e Ukrainës, Presidentja e Moldavisë, Maia Sandu, ka vizituar periferi të qytetit të shkatërruar nga lufta, duke përfshirë qytetet Borodyanka, Bucha dhe Irpin “për të parë me sytë e saj pasojat e pushtimit rus të territoreve ukrainase”, shkruan në “Telegram” kreu i administratës ushtarake rajonale të Kievit, Oleksiy Kuleba. Presidentja e Moldavisë e ka përshkruar shkatërrimin në periferi të Kievit si një “tragjedi të paimagjinueshme”. Presidenti ukrainas, Volodymyr Zelenskyy, i bëri thirrje homologes së tij moldave, Maia Sandu, për një përgjigje të koordinuar ndaj kërcënimeve të Rusisë, ndërsa dyshja u takua në Kiev të hënën. “Vendet tona kanë kërcënime me fillesa të përbashkëta, të krijuara nga agresioni rus dhe politika ruse. Nëse kërcënimet kanë rrënjë të përbashkëta, ne duhet të kemi një përgjigje të koordinuar ndaj tyre”, tha Zelenskyy gjatë një konference të përbashkët shtypi.
Zelenskyy përsëriti gjithashtu se “Ukraina mbetet një garantues” në rregullimin e situatës në Transnistria – rajoni separatist i Moldavisë me praninë ushtarake ruse – dhe “do të ndihmojë në mënyrë aktive Moldavinë për të ecur përpara”. Sandu vizitoi qytetet Borodyanka, Bucha dhe Irpin, të cilat u shkatërruan nga pushtimi rus në mars. Sandu përsëriti qëndrimin e Moldavisë “me zë të lartë dhe të qartë”, duke dënuar “dhunën e pakuptimtë të kësaj lufte dhe pushtimin”. Sandu shtoi se vendi i saj prej 2.6 milionë banorësh ka mirëpritur gjysmë milioni refugjatë ukrainas që nga fillimi i luftës në shkurt. Bashkimi Europian javën e kaluar ra dakord që Ukrainës dhe Moldavisë t’i jepet statusi kandidat - një hap i rëndësishëm në rrugën drejt anëtarësimit të plotë. Megjithatë, ka ende gjasa që të kalojnë vite përpara se Ukraina të jetë në gjendje të anëtarësohet në BE. Procesi është i gjatë dhe kërkon marrëveshje nga 27 shtetet anëtare pothuajse në çdo fazë. Kjo do të thotë se ka mundësi të shumta që shtetet anëtare të përdorin veton e tyre si një mjet negocimi politik.