G7, mbështetje për Ukrainën për aq kohë sa do t’i duhet Liderët e G7-ës do të vendosin kufi mbi çmimin e naftës ruse
Udhëheqësit e G7-ës u zotuan të vazhdojnë mbështetjen për Ukrainën për “sa kohë që të nevojitet”. Në një deklaratë të përbashkët pas një lidhjeje videofonike me Presidentin ukrainas, Volodymyr Zelenskyy, udhëheqësit nënvizuan, siç u shprehën ata, “angazhimin e palëkundur për të mbështetur qeverinë dhe popullin e Ukrainës në mbrojtjen e tyre kurajoze të sovranitetit të vendit dhe të integritetit territorial”. Udhëheqësit e G7-ës thanë se “i takon Ukrainës të vendosë për një zgjidhje paqësore në të ardhmen, pa trysni të jashtme dhe pa u ndikuar”. Presidenti ukrainas, Volodymyr Zelenskyy, u tha udhëheqësve të G7-ës se dëshiron që lufta në Ukrainë të përfundojë deri në fund të vitit 2022, sipas një burimi të njohur me komentet e tij. Zelenskyy
e dha mesazhin virtualisht në samitin e Grupit 7 të hënën, i cili po zhvillohet në kështjellën “Schloss Elmau” në alpet bavareze. Ai bëri thirrje për një shtytje të madhe për t’i dhënë fund luftës përpara se të fillojë dimri pas disa muajsh, tha burimi. Mesazhi i Zelenskyy-t ishte një shenjë po aq e qartë sa mënyra si e sheh ai trajektoren e luftës. Gjithashtu, udhëheqësit e vendeve të G7ës, pritet të bien dakord për vendosjen e një kufiri të çmimit të naftës ruse për të limituar të ardhurat e Moskës nga shitja e hidrokarbureve, si elementi kryesor i sanksioneve të reja ndaj Rusisë për pushtimin e saj të paprovokuar të Ukrainës. Disa media ndërkombëtare cituan zyrtarët amerikanë më 27 qershor, të cilët dhanë detaje se si do të funksiononte kufiri i çmimeve që po përcaktohet gjatë samitit, i cili përfundon më 28 qershor. “Objektivat e dyfishtë të liderëve të G7-s janë synimi i drejtpërdrejtë i të ardhurave të Putinit, veçanërisht ato të gjeneruara përmes energjisë, por gjithashtu të minimizojnë pasojat dhe ndikimin në ekonomitë e G7 dhe pjesën tjetër të botës”, tha një zyrtar amerikan për agjencinë e lajmeve “Reuters”. Grupi i vendeve të pasura perëndimore ka kërkuar të rrisë presionin ndaj Moskës, teksa përpiqet të minimizojë çdo dëm që mund t’u vijë ekonomive të tyre. Çmimet e naftës janë rritur që kur Rusia nisi luftën e saj kundër Ukrainës më 24 shkurt, pasi sanksionet kufizojnë eksportet ruse të lëndëve të para.