Mcallister: Po ju ndjekim! Investimet e huaja të jenë sipas rregullave të BE
Eurodeputeti Mcallister iu përgjigj letrës së 21 deputetëve të opozitës, ku argumentohej shkelja flagrante e MSA dhe ligjit të konkurrencës dhe ndihmës shtetërore, duke favorizuar haptazi Alabar. “Sundimi i ligjit, konkurrenca e transparenca, mbeten shqetësim madhor, jo vetëm për opozitën në Shqipëri, por edhe për BE”. Kreu i Komitetit të Punëve të Jashtme në PE reagoi pas interesit të 21 deputetëve, në lidhje me procedurat e përshpejtuara e jo transparente të ndjekura nga qeveria dhe Parlamenti për miratimin e ligjit për Marrëveshjen e realizimit të projektit “Durrës Yachts & Marina”. Shqetësimi i opozitës mbetet jo vetëm shkelja e legjislacionit aktual, afateve e procedurave, por edhe hapja rrugë dhe lehtësimi për dhënien e pasaportave të Arta për investitorët Strategjikë dhe blerësit e apartamenteve në këtë zonë. Sipas zyrtarit të BE, “investimet e huaja duhet të jenë në përputhje me rregullat e BE- së”. “Faleminderit për ndarjen e letrës së tre grupeve parlamentare, duke tërhequr vëmendjen për shkeljet e mundshme të Marrëveshjes së Stabilizim Asociimit, BE- Shqipëri. Sundimi i ligjit mbetet një parim udhëzues i procesit të zgjerimit dhe të gjitha akuzat për keqmenaxhim dhe korrupsion duhet të trajtohen si një çështje me rëndësi madhore. Transparenca, konkurrenca dhe masat mbrojtëse përkatëse janë thelbësore për të siguruar që investimet e huaja të jenë në përputhje me rregullat e BE- së dhe të kontribuojnë në transformimin socio- ekonomik të Shqipërisë”, shprehet Mcallister. Sipas tij, këto tema do të jenë subjekt i shqyrtimit të PE. “Jini të sigurt se PE do të vazhdojë të shqyrtojë nga afër procesin e anëtarësimit dhe reformat e Shqipërisë, duke përfshirë raportin vjetor për Shqipërinë, i cili do të paraqitet në Komisionin për Punët e Jashtme më 23 mars”, tha Mcallister.