Itali- Shqipëri, gati marrëveshja për njohjen e ndërsjellë të pensioneve
Përfitojnë mbi 500 mijë shqiptarë. Iu mbulohen pensionet e pleqërisë, sigurimet për përfitimet për sëmundjet dhe sigurimin për papunësinë
Pritja për njohjen e sigurimeve shoqërore për më shumë se 500 mijë emigrantë shqiptarë që prej vitesh jetojnë dhe punojnë në Itali do të marrë fund nesër.
Dy ministrat respektivë, të Shqipërisë e Italisë do të nënshkruajnë të martën marrëveshjen për njohjen reciproke të kontributeve për sigurimet shoqërore, nga e cila do të përfitojnë shqiptarët që kanë punuar në vendin fqinj, si edhe të gjithë ata italianë që jetojnë në vendin tonë. Përmes këtij pakti me rëndësi dhe të shumëpritur për vendin tonë do të mbulohen pensionet e pleqërisë, sigurimet për përfitimet për sëmundjet, si dhe sigurimin për papunësinë si për shqiptarët që jetojnë në Itali, ashtu edhe për shtetasit italianë që jetojnë e punojnë në Shqipëri dhe derdhin kontributet e tyre këtu. Pas firmosjes, marrëveshja para se të hyjë në fuqi duhet të kalojë për ratifikim në kuvendet respektive.
MARREVESHJA
Shqipëria dhe Italia kanë arritur dakordësimin e marrëveshjes teknike për njohjen e pensioneve të shtetasve shqiptarë që jetojnë në Itali dhe të shtetasve italianë që jetojnë në Shqipëri. Arritja e marrëveshjes u komunikua disa muaj më parë, por bisedimet mes dy shteteve kanë nisur vite më parë dhe janë intensifikuar që nga viti 2014. Përfitues nga kjo marrëveshje parashikohet të jenë afërsisht 500 000 mijë shtetas shqiptarë, të cilët jetojnë e punojnë në Itali.
Marrëveshja e dakordësuar bazohet në parimin e trajtimit të barabartë. Ajo mbulon pensionet e pleqërisë, sigurimet për përfitimet për sëmundjet dhe shtatzënitë, si edhe sigurimin për papunësinë. Sipas të dhënave të Institutit të Statistikave, janë rreth 50 000 ndërmarrje me NIPT italian, që ushtrojnë veprimtarinë e tyre në Shqipëri dhe që paguajnë kontributet e sigurimeve shoqërore, të cilët do të përfitojnë nga kjo marrëveshje.
Për të përfituar pension, si për personat që jetojnë në Shqipëri, ashtu edhe për ata që jetojnë jashtë vendit tonë, duhen minimalisht 15 vite pune të siguruar, ndërsa për të përfituar pension të plotë pleqërie duhen 36 vite e 8 muaj punë e siguruar.
Të gjitha vitet e punës që njihen si vjetërsi pune për efekt pensioni, llogariten që nga mosha 16 vjeç, si për burrat ashtu edhe për gratë dhe pavarësisht sektorëve ku kanë punuar. Hartimi i kësaj marrëveshjeje ka qenë një kërkesë e hershme e komunitetit shqiptar që jeton në Itali.
Shqipëria ka nënshkruar rreth 15 marrëveshja për njohjen e sigurimeve, duke filluar me Turqinë, në vitin 2005, duke vijuar me një numër shtetesh të tjera si me Kosovën, Belgjikën, Hungarinë, Luksemburgun, Çekinë, Gjermaninë, etj.
TAKIMET
Ministri për Evropën dhe Punët e Jashtme, Igli Hasani do të zhvillojë këto dy ditë vizita zyrtare në shtetin fqinj, gjatë së cilave parashikon të firmosë marrëveshjen me homologun Tajani për njohjen e pensioneve. “Marrëveshja vjen si një detyrim dhe e drejtë ndaj qytetarëve shqiptarë, italianë dhe italo- shqiptarë, të cilët kanë punuar me përkushtim për 30 vjet dhe kanë kontribuuar në ekonominë dhe përparimin social të të dy vendeve tona”, citohet në njoftimin e Ministrisë sonë të Jashtme.
Vizita e ministrit Hasani në Itali shënon një angazhim të thelluar për zgjerimin e bashkëpunimit me Italinë në fusha me interes reciprok, në përputhje me Deklaratën e Partneritetit Strategjik.
Synimi është rikonfirmimi i mbështetjes së Italisë, si në nivel dypalësh tashmë me një gamë të gjerë bashkëpunimi në fusha me interes të përbashkët, ashtu edhe në atë shumëpalësh, sidomos në integrimin evropian, duke rikonfirmuar mbështetjen e Italisë për një proces të përshpejtuar integrues deri në vitin 2030, siç ka deklaruar zëvendëskryeministri dhe MPJ, Tajani.