Ilir Pashaj, ish- gjyqtari i përfolur i Elbasanit për të dytën herë në gjykatë
Në janar, Pashaj u dënua me vendim të formës së prerë me 1.4 vjet burg për korrupsion aktiv, dënim që u shlye me kohën e paraburgimit
Ish- gjyqtari i njohur i Elbasanit, Ilir Pashaj, do të përballet për herë të dytë me gjykatën, pasi SPAK deklaroi ditën e djeshme se kishte përfunduar hetimet ndaj tij për dy veprat penale, atë të korrupsionit dhe të fshehjes së pasurisë dhe pastrimit të produkteve të veprës penale.
Sipas njoftimit të bërë publik për mediat, Pashaj ka konsumuar të paktën një herë veprën penale të korrupsionit gjatë kohës që ushtronte detyrën e gjyqtarit, ndërsa akuzohet se pasuritë e përfituara nuk i ka deklaruar në përputhje me ligjin, por i ka fshehur në emër të familjarëve të tij, familjarë të identifikuar tashmë. Sipas të dhënave SPAK, ka identifikuar dhe sekuestruar një automjet dhe një apartament në qytetin e Elbasanit, që dyshohet se janë pasuri e fshehur e ish- gjyqtarit. Ilir Pashaj është një nga gjyqtarët që u largua me dorëheqje në vitin 2017 nga sistemi i drejtësisë, përpara se të niste procesi i vetingut. Ai punoi më pas si avokat, por në korrik të vitit 2022 u arrestua si i implikuar në një çështje korrupsioni, që përfshiu edhe gjyqtaren Zamira Vyshka.
Në janar 2024, Pashaj u dënua me vendim të formës së prerë me 1.4 vjet burg për veprën penale të korrupsionit aktiv, dënim i cili u shlye me kohën e paraburgimit. Ai do të përballet për herë të dytë me Gjykatën e Posaçme lidhur me akuzat e reja të ngritura nga Prokuroria.
SPAK
Nga analiza e fakteve dhe provave rezulton se i pandehuri Ilir Pashaj, gjatë periudhës që ka ushtruar detyrën e gjyqtarit në Gjykatën e Rrethit Gjyqësor Elbasan ka përfituar në mënyrë të parregullt pasuri të luajtshme dhe të paluajtshme, të cilat janë produkt i veprës penale të korrupsionit, vepër penale e cila është vërtetuar si e konsumuar të paktën në një rast dhe konkretisht në rastin që lidhet me vendimin gjyqësor nr. 343, datë 29.7.2009, të
Gjykatës së Rrethit Gjyqësor Elbasan, me objekt “Lëshimin e urdhrit të ekzekutimit për titujt ekzekutive, vendimet nr. 255, dhe nr. 256, datë 29.6.2009 dhe nr. 244, datë 26.6.2009, të Zyrës Rajonale të Kthimit dhe të Kompensimit të Pronave”. Për shkak të funksionit të tij si gjyqtar në Gjykatën e Rrethit Gjyqësor Elbasan, shtetasi Ilir Pashaj është subjekt deklarues, bazuar kjo në ligjin nr. 9049 datë 10.04.2003 “Për deklarimin dhe kontrollin e pasurive, të detyrimeve financiare të të zgjedhurve, dhe të disa nëpunësve publikë”. I pandehuri Ilir Pashaj, për shkak të funksionit të tij si gjyqtar, nuk ka pasqyruar në deklaratat periodike të viteve 2015, 2016, dhe atë pas largimit nga funksioni, një automjet i targuar me targë AA…… JM, duke fshehur në këtë mënyrë këtë pasuri të luajtshme. Gjithashtu ky i pandehur nuk ka pasqyruar në këto deklarata as pasurinë e paluajtshme të përfituar në emër të vjehrrit të tij Sh. B.. Gjyqtari Ilir Pashaj edhe pse është i njohur me detyrimin ligjor për të deklaruar gjithë pasuritë e luajtshme dhe të paluajtshme, me dashje direkte i ka fshehur ato duke i regjistruar në emër të personave të tjerë të afërm të tij, duke konsumuar në këtë mënyrë elementë të veprës penale të parashikuar nga neni 257/ a/ 2 i Kodit Penal. I pandehuri Ilir Pashaj, është kujdesur që përfitimet e parregullta të përfituara për shkak të detyrës së tij si gjyqtar t‘ i maskojë në emër të të tjerëve ( vjehrrit dhe kunatit), duke fshehur pronarin dhe burimin e vërtetë të këtyre pasurive, konsumuar në këtë mënyrë edhe elementë të veprës penale të parashikuar nga neni 287 i Kodit Penal.
Ky shtetas me anë të të transferimit të pasurisë që është objekt përfitimi të parregullt tek të afërmit e tij, me qëllim mbulimin e origjinës së paligjshme të këtyre pasurive, ka konsumuar elementët e pastrimit të produkteve të veprës penale të parashikuar nga neni 287/ 1 gërma “a” e Kodit Penal. Gjatë hetimeve paraprake të këtij procedimi me kërkesë të Prokurorisë së Posaçme, Gjykata e Posaçme e Shkallës së Parë për Korrupsionin dhe Krimin e Organizuar, me vendimin nr. 92, datë 07.02.2024, ka vendosur sekuestron preventive mbi pasurinë e paluajtshme të llojit apartament, me sipërfaqe 105.2 m2, me vendndodhje në Elbasan ( në pronësi të shtetasit Sh. B. por që dyshohet se i përket të pandehurit Ilir Pashaj dhe që përbën produkt të veprës penale). Ky vendim është ekzekutuar nga Drejtoria Vendore e Policisë Elbasan. Gjithashtu me vendimin e datës 25.03.2022, prokurori ka vendosur sekuestrimin në cilësinë e provës materiale të automjetit me targë AA… JM, i regjistruar në emër të kunatit të të pandehurit Ilir Pashaj, por që rezulton se është pronë e tij. Ky vendim është ekzekutuar nga Policia Gjyqësore.