Presidenti Begaj: Arritje e merituar e Kosovës në rrugëtimin e saj drejt KIE

Presidenti i Republikës, Bajram Begaj, ka reaguar pas miratimit të raportit nga Komiteti për Politikë dhe Demokraci i Këshillit të Evropës të raportit për Kosovën, duke e sjellë shtetin fqinj një hap më pranë anëtarësimit në KIE. Begaj u shpreh se kjo është një arritje e merituar e Kosovës në rrugëtimin e saj drejt anëtarësimit të plotë në Këshillin e Evropës. Sipas tij, kjo dëshmon përkushtimin e palëkundur politik të Kosovës ndaj vlerave dhe standardeve evropiane. "Arritje e merituar e Kosovës në rrugëtimin e saj drejt anëtarësimit të plotë në Këshillin e Evropës. Kjo dëshmon përkushtimin e palëkundur politik të Kosovës ndaj vlerave dhe standardeve evropiane", - shkroi Begaj në rrjetet sociale. Ndërkohë, në emër të Kuvendit të Shqipërisë, Lindita Nikolla ka përshëndetur miratimin e propozimit për anëtarësimin e Kosovës në Këshillin e Europës. Nikolla, përmes një postimi në "Facebook", ka rikonfirmuar angazhimin dhe mbështetjen për Kosovën deri në anëtarësimin në KIE dhe në organizata të tjera ndërkombëtare. "Në emër të Kuvendit të Shqipërisë, përshëndes këtë sukses të merituar të Kosovës dhe rikonfirmoj angazhimin tonë për të vijuar mbështetjen për Kosovën deri në anëtarësimin në KIE, në organizata të tjera ndërkombëtare, shtimin e njohjeve dhe rritjen e kontributit të Kosovës në marrëdhëniet dhe zhvillimet ndërkombëtare",- nënvizoi Nikolla. Sakaq, edhe ministri i Jashtëm i Shqipërisë, Igli Hasani, ka uruar Kosovën për hedhjen e hapit të parë drejt anëtarësimit në Këshillin e Europës. Hasani shprehet se ky është një hap i rëndësishëm për Kosovën, ndërsa tashmë pritet anëtarësimi i plotë i shtetit të Kosovës në Këshillin e Sigurisë. "Ky hap i rëndësishëm vjen si rrjedhojë e angazhimit të vazhdueshëm të Kosovës në vlerat e demokracisë, të drejtat e njeriut dhe sundimin e ligjit. Mbetemi në pritje, që gjatë Sesionit të prillit të Asamblesë Parlamentare, të hapet rruga për përfundimin e procesit të anëtarësimit të Kosovës në Këshillin e Evropës", - shkruan Hasani.