Kush është Giovanni Ruggiero
Giovanni Ruggiero ka lindur në vitin 1953 në provincën e Caserta- s. Filloi të interesohej për fotografinë që në moshë shumë të re, bashkë me gazetarinë, që më vonë do të bëhej profesioni i tij. Ai tani është në pension. Në 25 vitet e fundit të aktivitetit si gazetar ka shërbyer si korrespondent special i gazetës “Avvenire”. Për këtë gazetë, ai ndoqi lajmet kryesore kombëtare ( vrasjet e gjyqtarëve Falcone dhe Borsellino, për shembull) dhe raportoi nga shumë vende. Veçanërisht ka ndjekur të gjitha ngjarjet në Shqipëri nga viti 1991 deri në vitin 2012, duke pasur mundësinë ta vizitojë shpesh dhe ta njohë nga afër vendin. E ka përdorur shpesh fotografinë për reportazhet e tij. Si fotograf ka hapur disa ekspozita në Itali dhe jashtë saj. Rreth 20 vjet më parë ai filloi të “ofrojë” fotografinë në një mënyrë jotradicionale: jo imazhin e printuar dhe të ofruar në një kornizë, por duke montuar fotografitë e tij ( madje edhe ato të bëra më parë) në kuti druri dhe të “kontaminuara” me materiale të tjera. Këto vepra janë pjesë e një serie të pafund ekspozuar nën titullin “Memento – Ex malo bonum”. Një nga veprat e tij është pjesë e “Benetton Collection Imago Mundi”. Në Shqipëri, në vitin 2012, çeli ekspozitën “… Pas dimrit të gjatë!” në Ministrinë e Kulturës me fotografi të realizuara në vitin 1992, me rastin e zgjedhjeve të para demokratike të atij viti. Gjithashtu në Tiranë, në vitin 2012, ai zhvilloi një workshop në universitetin “Polis” me fotografitë e tij të bëra në vitin 1991 në Bari në zbarkimin e anijes “Vlora”, gjatë “Javëve të Arkitekturës”. Aktualisht shkruan për revistën FOTOIT, organi zyrtar i FIAF- it ( Federata Italiane e Shoqatave Fotografike) dhe kuron ekspozita fotografike në Napoli për galerinë “Movimento Aperto”.