Lautaro rigjen golin me Argjentinën, vjen i freskët për Interin

Futet në "top 10" të golashënuesve, buzëqeshin zikaltrit

Lautaro Martinez rikthehet te goli. Argjentina fiton sërish dhe konfirmon vendin e parë në klasifikimin botëror, të paktën edhe për 3 muaj.

Kapiteni i Interit ka prishur mallkimin që zgjaste prej 1 viti e gjysmë duke u shndërruar sërish në protagonist. Kampionët e botës triumfuan 3- 1 me përmbysje ndaj Kosta Rikës duke e mbyllur në mënyrën më të mirë të mundshme mini turneun e zhvilluar në Amerikë. Lajmi më pozitiv i kësaj sfide për trajnerin Skaloni, por mbi të gjitha për tifozët e Interit ishte goli i realizuar nga "El Toro", që me fanellën "albiçeleste" nuk realizonte me aksion që nga 22 shtatori i vitit 2022 kundër Hondurasit. "Jam shumë i lumtur për golin. Është një çlirim dhe vlerësim për punën dhe qetësinë me të cilin e kërkova këto gol", ka deklaruar në fundin e sfidës kapiteni i Interit.

"DEMI" I TËRBUAR

Argjentina i risjell Interit një Lautaro të rigjeneruar, të karikuar dhe të freskët, sepse ndeshjen e luajtur ndaj Kosta Rikës nuk e nisi si titullar, por u aktivizua 20 minuta nga fundi. Pas 90 minutave të luajtura me El Salvadorin, bomberi nga Bahia Blanka ja la vendin nga minuta e parë Julian Alvarezit. Por aq pak minuta i mjaftuan që të shënonte golin e 22- të që vlen prezencën e tij në "top 10" e golashënuesve të Argjentinës. Prekja perfekte e topit erdhi pikërisht pas 7 minutash lojë nga aktivizimi në fushë pas asistit të De Polit. Lautaros i mungonte goli edhe me fanellën e Interit pasi në ndeshjet vendimtare të sezonit nuk arriti dot që të gjente rrugën e rrjetës, pavarësisht se në kampionat po bën një sezon të jashtëzakonshëm. Kjo do të thotë se rikthehet në Milano me një tjetër synim për të udhëhequr zikaltrit drejt titullit kampion.

KLASIFIKIMI

Me golin e realizuar ai ka arritur të kapë dy kampionë bote si Leopoldo Lukue dhe Daniel Pasarela. Tani në objektivin e Lautaros janë Luis Artime që ka shënuar 24 gola dhe Angel Di Maria me 27 të tillë. Ish- lojtari i Juventusit realizoi një supergol pikërisht në ndeshjen ndaj Kosta Rikës. Dei Maria u largua nga fusha e lojës në minutën e 82- të për t'i bërë vend Valentin Karbonit, i cili bëri debutimin me fanellën e kombëtares. Sulmuesi është lojtar i Interit në huazim te

Monza. Edhe ai bëri minuta shumë pozitive duke e shndërruar Argjentinën në "zikaltër". Gjithmonë ka pasur një lidhje të fortë mes kombëtares argjentinase dhe klubit nga Milano. Provë të mirë zhvilluan edhe lojtarët e tjerë "italianë" si Paredes apo Niko Gonzalez.