PS, kërkesë për ngritjen e një komisioni për të luftuar dezinformimin

Grupi parlamentar socialist i paraqiti dje një kërkesë kryetares së Kuvendit, për krijimin e një Komisioni të Posaçëm Parlamentar me fokus koordinimin dhe mbikëqyrjen e të gjitha përpjekjeve institucionale për të luftuar dezinformimin dhe format e tjera të ndërhyrjes së huaj në proceset demokratike në Shqipëri. Sipas Çuçit, ky Komision i Posaçëm parlamentar vjen pas marrëveshjes ndërmjet Shqipërisë dhe SHBA- ve, rekomandimet e BE- së dhe deklaratës së Samitit Ukrainë- Evropë Juglindore mbajtur në Tiranë. Pas kësaj, kryeministri Rama rishpërndau në rrjetin social “X” deklaratën e Çuçit, duke u shprehur se kjo është “shumë e rëndësishme për të ecur përpara me shpejtësi të plotë”. “Duke u bazuar në angazhimet e Shqipërisë që rrjedhin nga: Memorandumi i Mirëkuptimit i datës 15 shkurt 2024 ndërmjet Shqipërisë dhe SHBA- ve për të adresuar manipulimin e informacionit nga aktorët e shteteve të huaja. Deklarata e Tiranës e 28 shkurtit 2024 e Samitit Ukrainë- Evropë Juglindore dhe rekomandimet e BE- së për ‘ vazhdimin e përpjekjeve për mbylljen e hapësirës për ndërhyrjet e huaja dhe manipulimin e informacionit’, grupi parlamentar i PS vendosi t’i paraqesë një kërkesë kryetares së Kuvendit të Republikës së Shqipërisë për krijimin e një Komisioni të Posaçëm Parlamentar me fokus koordinimin dhe mbikëqyrjen e të gjitha përpjekjeve institucionale për të luftuar dezinformimin dhe format e tjera të ndërhyrjes së huaj në proceset demokratike në Shqipëri. Komisioni i Posaçëm do të zbatojë një qasje holistike dhe afatgjatë për adresimin e ndërhyrjes së huaj në proceset demokratike, që mund të përfshijnë fushatat e dezinformimit në mediat tradicionale dhe sociale për të ndikuar në opinionin publik, mbështetjen financiare të drejtpërdrejtë dhe të tërthortë për përpjekjet për dezinformim, shantazhimin ekonomik të aktorëve publikë dhe manipulimin e shoqërisë civile”, - tha Çuçi.