Çudia, Arsenali me një formacion më të shtrenjtë se Mançester Siti
11- shet e mundshme, "topçinjtë" 12.5 mln më shumë
Arsenali dhe Mançester do të përplasin brirët të dielën në "Etihad" në një përballje që do të thotë jo pak për garën e ardhshme për titull në Angli.
Përpara duelit mes Guardiolës dhe Artetës, "Sunsport" ka analizuar sesa shumë klubet kanë shpenzuar për të ndërtuar formacionin e tyre të mundshëm titullar. Siti akuzohet shpesh se është klubi që nuk ngurron ta fusë dorën thellë në xhep për të shpenzuar. Por në mënyrë të pabesueshme, formacioni i mundshëm që Pep Guardiola mund të hedhë nga minuta e parë në "Etihad" kushton më pak se skuadra me të cilën pritet të luajë Arsenali. Skuadra titullare me të cilën Siti luajti në betejën e tyre të fundit për titull kundër Liverpulit, pak para pushimit ndërkombëtar, u kishte kushtuar 413.4 milionë paund. Megjithatë, me portierin titullar Ederson ( 34.9 milionë paund) jashtë fushës për përballjen e kësaj fundjave, që me siguri do të zëvendësohet nga Stefan Ortega i ardhur me parametër zero në Mançester, do bëjë që formacioni i mundshëm titullar i "qytetarëve" të zbresë në 378.5 milionë paund. Kësaj i duhet shtuar edhe i dëmtuari Xhek Grilish, për të cilin Siti pagoi 100 milionë paund. Por çmimi relativ i ulët i Erling Halandit prej 51.4 milionë paundësh e mban koston e skuadrës së Sitit të ulët, ndërsa një numër transferimesh me kosto të ulët, kompensojnë 62.5 milionë paundët e shpenzuara për
Rodrin. Foden ( 0), Alvarez ( 14 milionë paund) dhe Akanzhi ( 15.1 milionë £) e kanë forcuar veten si titullarë të rregullt në sistemin e Pep, pavarësisht se i kushtojnë klubit vetëm "qindarka" në krahasim me yjet e tjerë. Por Mançester Siti do të ketë në stol një sasi monstruoze talentesh, që do të rrisin çmimin e pankinës së tyre të luksit të dielën, me yje si Diaz,
Gvardiol, Doku dhe Nunjez. Vetëm këta të katërt i kushtuan kampionëve të Anglisë 250 milionë paund së bashku dhe janë aktivizuar shpesh me rotacion këtë sezon.
ARSENALI
"Topçinjtë" kanë të ngjarë të rreshtohen në "Etihad" me një skuadër që i ka
kushtuar në total 12.5 milionë paund më shumë se Mançester Siti. Titullarët e Mikel Artetës pritet të arrijnë një shifër 391 milionë paund. Një pjesë e madhe e kësaj tarife shtohet prej transferimit më të shtrenjtë të historisë së klubit në verë, Deklan Rajsit për 105 milionë paund nga Uest Hemi. Edhe Kai Haverc ishte gjithashtu një transferim i kushtueshëm i verës së fundit nga Çelsi, për 65 milionë paund. Saka ( 0), Saliba ( 27 milionë), Magalhaesh ( 27 milionë) dhe Odegard ( 30 milionë paund) janë të gjithë emra që do të vlenin shumë më tepër nëse do të shiteshin sot. Gabriel Martineli i
kushtoi Arsenalit vetëm 6 milionë paund dhe do të ulte koston e tyre fillestare nëse do të ishte në gjendje të luante titullar këtë fundjavë. Megjithatë, ka dyshime që Arteta do të luajë me Trosardin në krahun e majtë të sulmit nga minuta e parë. Belgu i kushtoi londinezëve 26 milionë paund nga Brajtoni dhe rrit koston e formacionit të tyre të mundshëm titullar me 20 milionë sterlina. Por pak rëndësi kanë këto shifra për tifozët e skuadrës. Për ta ka rëndësi sesi do të shkojnë gjërat në fushë, në një ndeshje që konsiderohet si një finale për nga rëndësia në garën e ngushtë për titull këtë sezon në Angli.