Hakmerret Serbia , “mban peng” zëvendësdrejtorin e Policisë së Kosovës dhe 9 policë
Pas disa orësh lirohen zyrtarët policorë, 4 8 orë në paraburgim për Dejan Jankoviç
Serbia ka përshkallëzuar veprimet në shenjë hakmarrjeje pas anëtarësimit të Kosovës në Këshillin e Europës.
Ditën e djeshme një zëvendësdrejtor i Policisë së Kosovës dhe nëntë zyrtarë të tjerë policorë u mbajtën peng nga autoritetet serbe dhe u liruan pas disa orësh e pas reagimesh të shumta. Lajmi është bërë me dije nga Ministria e Punëve të Brendshme e Kosovës, e cila tha se zëvendësdrejtori i Policisë së Kosovës i nacionalitetit serb, Dejan Jankoviç, është duke u mbajtur në ndalim nga mëngjesi i sotëm pa asnjë sqarim. Jankoviç, i cili vjen nga komuna e Shtërpcës - u ndalua në pikën kufitare me Serbinë, Jarinjë, në veri të Kosovës dhe u dërgua për intervistim në qytetin jugperëndimor të Serbisë, Rashkë. Kryeministri i Kosovës, Albin Kurti, tha se sipas informacioneve të fundit, zyrtarët policorë të Kosovës që po mbaheshin në Rashkë të Serbisë janë liruar dhe i ndaluar vazhdon të mbetet vetëm zëvendësdrejtori i Policisë së Kosovës, Dejan Jankoviç. Gjatë mbledhjes së Qeverisë së Kosovës, Kurti tha se zyrtarët policorë ishin ndaluar në pikat kufitare mes Kosovës dhe Serbisë në Merdarë, Dheu i Bardhë e Jarinjë, si dhe në një pikëkalim kufitar mes Serbisë dhe Kroacisë. "Zëvendësdrejtori i policisë vazhdon të mbahet në burg në Serbi", - tha Kurti, duke iu referuar Jankoviçit. Kryeministri i Kosovës tha se Serbia po kërkon tensione sepse nuk i intereson normaliteti. "Serbia kërkon tensione sepse nuk i konvenon normaliteti. Normaliteti nënkupton paqe, siguri e qetësi në rajon. Sa më shumë që ka paqe, siguri e qetësi në rajon aq më e parëndësishme bëhet Serbia andaj vepron gjithnjë në drejtim të kundërt. E teksa pas mbi 20 orësh maltretimi e ndalimi shumica dërrmuese e qytetarëve vazhduan rrugëtimin e tyre, dje pesë qytetarë të Republikës, pjesëtarë të Policisë së Kosovës u mbajtën edhe më tej, prej tyre katër nga komuniteti serb dhe 1 shqiptar", - tha Kurti. Ai kërkoi lirimin e zv. drejtorit të Policisë, Dejan Jankoviç, lirim për të cilin tha se e kërkon pa kushte dhe në mënyrë të menjëhershme. Ministria kosovare në një komunikatë tha se autoritetet serbe i kanë ndaluar fillimisht "10 pjesëtarë të Policisë së Kosovës ( shqiptarë dhe serbë)", - por shtoi se pesë prej tyre u liruan. Sipas ministrisë, institucionet përkatëse janë në proces të sigurimit të informacioneve të sakta për të sqaruar situatën e krijuar. Autoritetet thanë se nëntë zyrtarë policorë janë liruar, ndërkaq ndaj Dejan Jankoviç, Serbia ka caktuar masën e paraburgimit prej 48 orësh nën akuzën për prishje të rendit kushtetues të Serbisë.
REAGIMET
Në ceremoninë e diplomimit të kadetëve të Policisë së Kosovës, Osmani i bëri thirrje faktorit ndërkombëtar që të reagojë për këtë çështje. "U bëjmë thirrje të gjithë aleatëve tanë që ta ngrenë zërin dhe t'i rrisin përpjekjet që të ndalin mizoritë dhe veprimet e tilla shoviniste kundër qytetarëve tanë dhe kundër policisë sonë. Por, jam e bindur që betimi i sotëm dhe të gjithë këta kadetë dhe ky grup multietnik është përgjigjja më e fuqishme kundër përpjekjeve të tilla", - tha Osmani. Presidentja e Kosovës, e cilësoi Serbinë si një shtet "shovinist". "Përderisa vazhdimisht për
ballemi me sfida të sigurisë, të mos harrojmë edhe në këto momente pesë policë të Republikës sonë po mbahen peng nga një shtet shovinist, nga Serbia", - shtoi ajo. Osmani tha se kërcënimet dhe rreziqet janë përditshmëri e shtetit kosovar, ndaj është domosdoshmëri që Republika e Kosovës me institucionet e saj të jetë anëtare fuqiplotë e INTERPOL- it dhe e EUROPOL- it. Ministria kosovare i akuzoi autoritetet serbe se i kanë mbyllur qytetarët në zyrat e autoriteteve të Serbisë me orë të tëra dhe nga persona të ndryshëm janë intervistuar për pjesëmarrjen apo lidhjet e tyre eventuale me Ushtrinë Çlirimtare të Kosovës, apo me luftën në Kosovë. Ndalimi i Jankoviçit vjen në të njëjtën ditë kur Ministria e Jashtme e Kosovës tha të mërkurën herët se Serbia ka ndaluar autobusë me udhëtarë nga Kosova, në kufijtë me Kroacinë dhe Hungarinë, si "shenjë hakmarrjeje ndaj mbështetjes nga Asambleja Parlamentare e Këshillit të Evropës për anëtarësimin e Kosovës në këtë organizatë". Ndërkaq, ministri i Punëve të Brendshme i Kosovës, Xhelal Sveçla, përsëriti se ende nuk ka ndonjë arsyetim nga Serbia se pse pesë zyrtarët policorë po mbahen në Rashkë. Ai tha se ky është një akt i paprecedent i Serbisë, mes shumë veprimesh e sulmesh drejtuar Policisë së Kosovës. "Ky është një sulm i drejtpërdrejtë i Serbisë ndaj pjesëtarëve të vet komunitetit serb brenda Policisë së Kosovës, të cilët gjejnë vullnetin dhe guximin të bashkohen në rrugën e përbashkët që synon shërbim e siguri për të gjithë qytetarët dhe stabilitet për vendin tonë", - tha Sveçla. Ministri i Brendshëm iu drejtua veçanërisht të diplomuarve nga komunitetet joshumicë, të cilëve iu tha se "Republika është e përbashkët. "Në sfidat që mund të ballafaqoheni nga sot e tutje ne jemi mbështetja e juaj, e cila nuk ka munguar edhe ndaj kolegëve tuaj kur janë kërcënuar në detyrën e tyre", - tha Sveçla. Sipas drejtorit të përgjithshëm të Policisë së Kosovës, Gazmend Hoxha, 20 për qind e gjeneratës së re të policisë që u diplomua, janë nga komunitetet joshumicë. Sipas tij, 357 janë shqiptarë, 37 serbë, 27 boshnjakë, shtatë egjiptianë, gjashtë ashkali dhe katër nga komuniteti rom.