Hungaria prioritet BP, Szijarto: Po minohet besueshmëria në politikën e përbashkët evropiane

Gjatë Presidencës së BE- së, Hungaria do të fokusohet në zgjerimin me shtetet e Ballkanit Perëndimor. Në një konferencë për shtyp me kolegun çek Jan Lipavski, ministri i Jashtëm hungarez, Peter Szijarto tha se ky rajon nuk e meritonte të priste 14 vjet e 11 muaj për anëtarësim, gjë që ka minuar besueshmërinë e politikës së Bashkimit Evropian. "Ballkani Perëndimor nuk e meriton që të presë 14 vjet e 11 muaj për anëtarësimin në BE, gjë që minon besueshmërinë e politikën e përbashkët evropiane. Është një situatë që duhet zgjidhur. Presidenca hungareze do të ketë një axhendë të qartë dhe me hapa konkrete për të ndihmuar vendet e Ballkanit Perëndimor të përshpejtojnë procesin e anëtarësimit", - tha ai. Szijártó vuri në dukje se efektet e migracionit janë ndjerë drejtpërdrejt në Evropën Qendrore që nga viti 2015 dhe është i nevojshëm një bashkëpunim serioz rajonal për të ndalur fluksin e emigrantëve. "Policia çeke, sllovake dhe polake na kanë ndihmuar dhe po na ndihmojnë për të mbajtur jashtë kufijve jugorë të Hungarisë emigrantët e paligjshëm që kërcënojnë Evropën e Bashkuar. Duhen vlerësuar përpjekjet e përbashkëta dhe në vijimësi të katër kryeministrave të Evropës Qendrore. Këto përpjekje janë të nevojshme për të mbajtur nën kontroll çështjen e kuotave dhe për të mos lejuar që dhjetëra mijëra emigrantë të paligjshëm të bredhin nëpër shtetet tona të pakontrolluar", - u shpreh ai. Kryediplomati Lipavsky tha se Republika Çeke vlerësoi faktin që një nga prioritetet e Presidencës hungareze ishte zgjerimi i Bashkimit Evropian me shtetet e Ballkanit Perëndimor.