PE, kundër unanimitetit: Ballkani Perëndimor po na afrohet më shumë
Franca pro zgjerimit të BE- së, Macron garanton integrimin e s hpejtë, por apelon për reformat që duhet të bëjnë shtetet kandidate
Parlamenti Evropian festoi dje 20- vjetorin e zgjerimit më të madh të Bashkimit Evropian ( BE) dhe liderët aktualë dhe të mëparshëm evropianë theksuan rëndësinë e zgjerimit të mëtejshëm të BE- së. Qiproja, Republika Çeke, Estonia, Hungaria, Letonia, Lituania, Malta, Polonia, Sllovakia dhe Sllovenia iu bashkuan BE- së më 1 maj 2004.
Ky ishte zgjerimi i pestë dhe më i madh në historinë e BE- së. Presidentja e Komisionit Evropian, Ursula von der Leyen, tha në seancën formale të PE se dëshira për të bashkuar Evropën dhe për të kompletuar BE- në është sot më e rëndësishme se kurrë më parë. "Ballkani Perëndimor po na afrohet më shumë. Ne morëm një vendim historik për të filluar negociatat me Ukrainën dhe Moldavinë, ndërsa populli i Gjeorgjisë nuk i fsheh ëndrrat e tij evropiane. Ne duhet të presim me padurim zgjerimin e ardhshëm", - deklaroi Ursula von der Leyen. Kurse Roberta Metsola u shpreh: "Anëtarësimi në Bashkimin Evropian nuk kufizohet vetëm në përkthimin e legjislacionit. Është një proces shumë më i thellë. Evropa mund të ketë ndryshuar secilin prej shteteve të saj anëtare që nga viti 2004. Po ashtu çdonjëri prej këtyre shteteve anëtare e ka transformuar gjithashtu Evropën. Shtetet e Ballkanit Perëndimor mezi presin të njëjtin proces. Pa to Evropa nuk mund të shikojë larg". Pro zgjerimit të shpejtë ishin edhe Pat Cox e Romano Prodi, presidentë të Parlamentit dhe Komisionit Evropian në kohën e zgjerimit të madh me 10 vende të lindjes ish- komuniste. Prodi tha se tani ka vende të reja që duan të anëtarësohen në BE dhe se atyre duhet t'u jepet një përgjigje pozitive. Ai shtoi se rregullat që rregullojnë Evropën gjithashtu duhet të thjeshtohen. Ish- presidenti i PE Cox tha se Unioni duhet të përgatitet institucionalisht dhe financiarisht për pranimin e anëtarëve të rinj. Sipas tij BE duhet të jetë e hapur për të gjitha shtetet e kontinentit evropian që kanë të njëjtat vlera demokratike dhe që duan të jenë pjesë e familjes evropiane.
PREMTIMI
Presidenti Macron garantoi integrimin e shpejtë evropian të shteteve ballkanike në fjalimin e mbajtur në Universitetin e Sorbonës. Macron premtoi mbështetje për reformat e brendshme brenda BE- së dhe në shtetet kandidate. "Ne kemi filluar të rimendojmë gjeografinë tonë brenda kufijve të kontinentit tonë. Evropa tani e mendon veten si një e tërë dhe në koherencë pas agresionit rus, duke e sjellë Ballkanin Perëndimor, Ukrainën dhe Moldavinë si pjesë e familjes sonë evropiane. E thashë vitin e kaluar në Bratislavë se na takon ne që të mbështesim tani reformat e nevojshme për t'u përgatitur për këtë rrugë dhe në të njëjtën kohë të reformojmë BE që mund të zgjerohet vetëm nëse reformohet në thellësi dhe i thjeshton procedurat. Ne kemi forcuar lidhjet tona me të gjitha shtetet edhe me Komunitetin Politik Evropian. Kjo nismë që ne propozuam në muajin maj 2022 bën të mundur që të shkojmë përtej kornizës prej 27 anëtarësh dhe të mendojmë për Evropën nga miqtë tanë britanikë deri në Ballkanin Perëndimor", - deklaroi Macron. Më 12 prill gjatë vizitës së kryeministrit Rama në Paris Macron deklaroi se që nga mbajtja e Konferencës së Parë Ndërqeveritare Shqipëria ka vijuar me vendosmëri rrugën e saj evropiane. Ai ofroi mbështetjen franceze në mënyrë që negociatat me vendin tonë të ecin sa më shpejt të jetë e mundur.