Vërtetësia gjeopolitiko- sportive e GANEFO- s në librin e rrallë të autorëve Armillotta e Bagozzi
Libri përshkruan me besnikëri historinë e harruar të pjesëmarrjes së rëndësishme të Shqipërisë në GANEFO 1963
Them i rrallë, sepse ky libër i autorëve Giovanni Armillotta dhe Marco Bagozzi është sa i rrallë, e po aq unik në kuptimin e "vetmisë" së tij, për trajtesën historiko- shkencore që realizon deri në imtësi.
Dhe nuk kishte se si të ndodhte ndryshe, kur mendon fuqinë njohëse dhe studiuese të dy autorëve. Kolegu dhe miku im i hershëm, Giovanni Armillota - studiues i gjeopolitikës në tanësi - tashmë edhe një historian i sportit shqiptar, i nderuar prej nesh me çmimin "Anton Mazrreku"; drejtues i revistave të tilla si "Afrikana" e "Metodo", bashkëpunëtor i disa gazetave e revistave dhe autor i disa librave, të cilin shqiptarët e njohin prej vitesh. Ndërkaq, bashkautori Marco Bagozzi, doktor i shkencave politike pranë Universitetit të Studimeve të Triestes është një sagjist dhe historian i mirënjohur për botimet e tij jo vetëm sportive, të prirura drejt historisë së sporteve dhe gjeopolitikës sidomos të lindjes komuniste aziatike. Kjo në libra ku sporti dhe politika në zhvillimet e tyre paraqiten përmes një bashkëpunimi fort qëllimor, të vetë historisë të këtyre vendeve.
Dhe ja libri në fjalë "I GANEFO 1963 e 1966 - Ribellione e riscatto" (" GANEFO 1963 e 1966 - Ribelim dhe shpengim"). 350 faqe në imtësinë e një informacioni analitiko- historik, ku sundon një statistikë e pamatë, deri në qindra e qindra emra, ndeshje e rezultate të pambarim.
Pak kohë më parë në gazetën "Panorama Sport" është botuar shkrimi me titullin "Vaso Shaka - kryeshënuesi i turneut të basketbollit në Lojërat Botërore
GANEFO". Botimi është shoqëruar me këto fjalë të redaksisë: "Ky material botohet nën kujdesin e bashkëpunëtorit tonë Besnik Dizdari, të cilit ia ka dërguar kolegu Giovanni Armillotta. Ai na premtoi se zbulimi i Armillotta- s e nxit për të përshkruar më vonë krejt pjesëmarrjen e Shqipërisë në GANEFO 1963 - ngjarje e madhe, madje e gjeopolitikës thuajse të bujshme për kohën, njohuritë për të cilën thuajse janë harruar krejtësisht". Kësisoj, ndërsa po rropatesha për të nisur një dossier për GANEFO, prej Giovanni- t më mbërrin libri në fjalë dhe unë pa asnjë mëdyshje, mbas leximit të tij, hoqa dorë nga shkrimi im. Kësisoj, ngaqë pashë thellësinë e trajtimit të asaj historie deri në hollësi e me plot kompetencë. Sigurisht brezi ynë i gazetarëve, dihet, që shkruajnë jo temat që nuk i dinë, por temat që pak a shumë i dinë, ose që ia arrijnë t'i mësojnë përmes studimeve të rrepta.
Lucio Caraçiolo, drejtori i mirënjohur i revistës së famshme italiane të gjeopolitikës "Limes", e përcakton kështu në parathënie vlerën e librit: "... Një libër që qysh në faqet e para nuk bën gjë tjetër veçse të rrit dëshirën për ta lexuar...". Nuk ia vlen të zgjatemi. Gazeta "Panorama" po boton këtu kapitullin 6 të librit që përshkruan me besnikëri historinë e harruar të pjesëmarrjes së rëndësishme të Shqipërisë në GANEFO 1963. E kam përkthyer fjalë për fjalë. Autorët, të cilët dihet, nuk e njohin plagjiaturën, e shoqërojnë librin me bibliografinë tejet të pasur e deri dhe me falënderimet. Do të gjesh qysh në faqen hyrëse si një falënderim të sinqertë, emrat e të respektuarve Xhorxhi Vasili, Bujar Qesja, Astrit Hutka, Bojken Sinaj. Natyrisht pa harruar bibliografinë mbështetëse që vjen prej librave të Ismet Bellovës, Osman Palushit, Besnik Dizdarit, Ergys Alushit e padyshim edhe prej gazetës "Sporti Shqiptar" e "Futbolli Shqiptar Mg.". E deri te shfrytëzimi filmik i Niko Theodhosit të Kinostudios "Shqipëria e Re". Pa harruar vendosjen e emërorit analitik të të përmendurve në libër si dhe atë të shteteve e qyteteve. Duke ua vënë vulën vlerave të mëdha të librit shoqërimi i tij me plot 160 foto, shumica krejt të panjohura, 17 prej të cilave për Shqipërinë.
Shkencë e plotë përveç të tjerave. Kjo është saktësia e madhe e shkrimeve, librave, studimeve e gazetarëve e historianëve të vërtetë, në këtë rast të personifikuar me autorët Giovanni Armillotta e Marco Bagozzi.