Maradona: Higuain gaboi që u largua nga Napoli

"Te Juvja nuk do përsërisë atë që bëri sezonin e kaluar"

Pas komentit të parë, ku Diego Armando Maradona e quajti "një mëkat" largimin e Gonzalo Higuainit nga Napoli për t'u transferuar në Torino te Juventusi, legjenda e futbollit të Argjentinës është rikthyer të flasë sërish për të njëjtën temë, teksa tha ditën e djeshme: "Napoli bëri mirë që e shiti lojtarin, pasi klauzola kishte një çmim shumë të lartë", tha fillimisht Maradona. Më tej ai shtoi: "Jam i bindur që Higuain nuk do tregojë më të njëjtin rendiment të sezonit të kaluar. Mirëpo, mua nuk pëlqeu mënyra se si u largua, ishte shumë e gabuar. Atë që të dhurojnë tifozët e Napolit nuk e merr dot në asnjë tjetër klub italian. Nuk më pëlqeu që Gonzalo kreu në fshehtësi vizitat mjekësore". Maradona duket se nuk e ka pritur mirë largimin e bashkatdhetarit të tij nga Napoli. Ish- trajneri i përfaqësueses së Argjentinës theksoi se futbollisti nuk u tregua korrekt me drejtuesit e klubin, duke e argumentuar zgjedhjen e golashënuesit më të mirë të Serisë A në sezonin e fundit për t'iu bashkuar Kampionëve të Italisë.

Tradhtia- Sakaq, ditën e djeshme ka reaguar për të parën herë lidhur me këtë çështje edhe sulmuesi 28vjeçar. Higuain, gjatë një prononcimi të shkurtër për të përditshmen italiane "Il Mattino", ka thënë se nuk ndihet "tradhtar", siç e etiketojnë tifozët e Napolit. Futbollisti ka bërë të ditur se së shpejti do të sqarojë pozicionin e tij me anë të një konference për shtyp. Lojtari ka theksuar se ka dhënë gjithçka në periudhën kur mbante të veshur fanellën e kaltër dhe nuk trashëgon asnjë peng.