Milani bën “pazar” te Juventusi
Zaza, Kuadrado, Rugani dhe Kaseres janë objektivat në merkaton e "Djallit"
Milani duket se ka hedhur sytë në shtëpinë e Juventusit për të nisur rindërtimin në sezonin e ardhshëm. Sipas së përditshmes italiane "Tuttosport", katër futbollistë, të cilët sezonin e kaluar kanë qenë pjesë e organikës së bardhezinjve, janë objektivat kryesore në merkaton e "Djallit". Të fillojmë nga mbrojtja, ku vështirësitë për të gjetur një akord me Vijarealin për Mateo Musakion duket se kanë shtyrë administratorin kuqezi, Adriano Galiani, të mendojë për lojtarin e Juventusit, Daniele Rugani. Ky i fundit vështirë se do të gjejë hapësira te kampionët e Italisë pas mbërritjes së Mehdi Benatias dhe kërkon të largohet gjatë merkatos. Milani është i gatshëm të ofrojë 25 milionë euro për italianin, mirëpo bardhezinjtë nuk kërkojnë të privohen nga Rugani, të cilin duan ta huazojnë, në mënyrë që lojtari të fitojë eksperiencë. Një tjetër objektiv për mbrojtjen është Martin Kaseres. Kuqezinjtë i kanë ofruar lojtarit një kontratë 3vjeçare prej 2 milionë eurosh në sezon. Uruguaiani është momentalisht pa skuadër pas përfundimit të kontratës me Juventusin. Një tjetër lojtar, i cili në sezonin e kaluar ka qenë pjesë e bardhezinjve dhe tani është në "radarin" e Milanit, është edhe Huan Kuadrado. Futbollisti pas huazimit në Torino është rikthyer në Londër, por flitet se u ka kërkuar drejtuesve të Çelsit të luajë sërish në Itali. Trajneri Vinçenco Montela e njeh mirë kolumbianin, i cili, sipas tij, është lojtari ideal për t'u aktivizuar si sulmues krahu në modulin 4-4-3. Në fund është edhe kapitulli "Baka". Milani e ka nxjerrë zyrtarisht lojtarin në merkato, në pritje të ofertave. 29-vjeçari vlerësohet 30 milionë euro dhe zëvendësuesi i tij ideal për drejtuesit kuqezi është Simone Zaza. Sulmuesi i Juventusit do të largohet pas mbërritjes së Higuanit në Torino, mirëpo nuk kërkon të provojë një aventurë të re jashtë kufirit italian, teksa Milani është një opsion që e tërheq.