WADA, kundër CIO-s për pjesëmarrjen në Olimpiadë
Agjencia Botërore e Antidopingut (WADA) është e zhgënjyer që rekomandimi i saj për të përjashtuar Rusinë nga Lojërat Olimpike të muajit të ardhshëm në Rio është refuzuar nga Komiteti Ekzekutiv i Komitetit Olimpik Ndërkombëtar (CIO). Pas skandalit të dopingut në Rusi, CIO vendosi pjesëmarrjen e Rusisë në Olimpiadën e Rios duke ua lënë në dorë tashmë Federatave Ndërkombëtare. WADA i qëndron rekomandimit të saj të muajit të kaluar për dënimin kolektiv të kombëtares ruse olimpike. Shefi i WADA-s, Olivier Nigli, tha se vendimi i CIO-s në mënyrë të pashmangshme do të thotë "mbrojtje më të vogël për sportistët e pastër". Ndërsa presidenti i Agjencisë, Sir Kreig Ridi, tha se hetuesit kishin "ekspozuar, përtej çdo dyshimi të arsyeshëm, një program shtetëror dopingu në Rusi që prekin rëndë parimet e sportit të pastër të mishëruar brenda Kodit të Antidopingut Botëror". Jashtë Olimpiadës u la edhe atletja Juliya Stepanova, edhe pse dëshmia e saj hodhi dritë për skandalin e dopingut në vendlindjen e saj. Më herët u përfol si opsion që ajo mund të konkurronte në Rio me flamurin olimpik, por Ekzekutivi i CIO-s e hodhi poshtë. Sakaq, një raport i ekspertit McLaren i është dërguar jo vetëm Komitetit Olimpik Ndërkombëtar, por edhe atij Paraolimpik (IPC). Lajmi konfirmohet po nga WADA. IPC-ja do të marrë vendimin e vet nëse do të lejojë atletët rusë në Lojërat Paraolimpike. Tashmë kanë nisur procedurat e pezullimit kundër Rusisë. Në përgjigje të kërkesës së CIO-s që agjencia të rishikojë sistemin antidoping, WADA tha se ishte plotësisht e angazhuar për forcimin e mëtejshëm të sistemit. Ajo konfirmoi gjithashtu se profesor Riçard McLaren do të vazhdojë punën e tij hulumtuese në rastet kundër dopingut.