Skënderbeu “refuzon” Fejzullahun
"Nuk bëjmë shkëmbime mes një sulmuesi e një mbrojtësi, është jashtë logjike për ne"
Skënderbeu refuzon Arbnor Fejzullahun. Pas më shumë se një muaji tratativash, me sa duket, klubi është dorëzuar. Gara për të siguruar shërbimet e mbrojtësit nuk ka pasur fund të lumtur për korçarët dhe kjo ndoshta ka ardhur për shkak edhe të kontratës që ai ka me Partizanin. E, në të tilla kushte, bardhekuqtë kanë menduar që t'i vendosin "kapakun" kësaj historie vere. Ata ua kanë kaluar faturën mediave, duke e cilësuar këtë një spekulim. Edhe pse drejtuesit bënë të pamundurën për t'i "rrëmbyer" mbrojtësin e linjës së djathtë Partizanit, ata dje kanë dalë me një qëndrim zyrtar duke e thënë hapur se nuk e kanë në plane Fejzullahun. Pra, "aventura" e kosovarit te Skënderbeu zgjati vetëm pak ditë gjatë fazës përgatitore në Austri, çka u faktua edhe me një foto që u shpërnda masivisht në media.
Deklarata - Të gjithë këtë sqarim klubi e ka bërë me anë të një deklarate për shtyp. Skënderbeu ka mbajtur qëndrim zyrtar për 23-vjeçarin, teksa, përtej respektit që mbartin për të, theksojnë se nuk e kanë në plane. Madje, saktësojnë se është jashtë çdo logjike një këmbim mes mbrojtësit të Partizanit dhe sulmuesit të tyre, Xhejms Adeniji. "Klubi i Futbollit
'Skënderbeu', duke marrë shkas nga lajmet e publikuara së fundmi, por jo për herë të parë në mënyrë joprofesionale, bën të ditur që në kampin bardhekuq nuk ka asnjë çështje 'Fejzullahu'. Nisi me spekulime që në Austri me lajme aspak të pavërteta e duke
vazhduar dhe sot me fantazi të shfrenuar. Fejzullahu është një lojtar i respektuar si të gjithë futbollistët e tjerë nga klubi ynë, po nuk bën pjesë në planet tona, për më tepër në lidhje me shkëmbim futbollist me futbollist. Është totalisht jashtë logjikës shkëmbimi
i një sulmuesi me një mbrojtës. E ritheksojmë që askush nga lojtarët e përmendur gjatë këtyre ditëve në rrjete sociale dhe në media nuk janë në planet tona. Të gjitha afrimet dhe zyrtarizimet do të bëhen si gjithmonë publikë nga klubi ynë, ashtu siç janë publikuar të gjitha zhvillimet dhe lajmet e mëparshme! Bëjmë thirrje që media të tregohet më tepër profesioniste dhe e matur me lajmet që publikon për Skënderbeun dhe jo vetëm, pasi nuk është etike që një futbollist ta dërgojnë me patjetër në një skuadër. Nuk është media ajo që e zhvillon merkaton, por vetë klubi ynë!", thuhej në reagimin e plotë të klubit bardhekuq të mbajtur një ditë më parë, që në fakt erdhi fill pas deklaratës së bërë nga presidenti Gazmend Demi, i cili qartësoi se mbrojtësi i djathtë është pjesë e Partizanit.