Myler: Dortmundi i ri na bën nder
"Borusia është më e fortë dhe një kundërshtar më rivalizues na ndihmon edhe neve"
Pas katër titujsh radhazi Bundeslige, Tomas Myler parashikon një sezon spektakolar, ku Bajerni i Mynihut këtë herë do ta ketë më të vështirë për ta thyer Borusian e Dortmundit. Shkaku? 100 milionë euro të shpenzuara në merkaton e verës për të sjellë 9 futbollistë, pjesa më e madhe e të cilëve të një cilësie dhe eksperience të sprovuar, ndërkohë që pjesa tjetër talente me një të ardhme të sigurt. Dhe ajo që verdhezinjtë i bën edhe më frikshëm është fakti që ata tashmë kanë tre lojtarë të kombëtares gjermane në sulm, Mario Gëcen, Andre Shyrrlen dhe Marko Rojsin. Ideja që ata do të luajnë së bashku në "Signal Iduna Park" e nxit sulmuesin e Bajernit që të paralajmërojë sfidën: "Është bukur kur kolegët e kombëtares luajnë te rivalët më të mëdhenj në kampionat". Jo frikë, por respekt
Por, Tomas Myler nuk trembet aspak nga kërcënimi i shtuar i skuadrës së Tomas Tuhelit, përkundrazi mendon se një rival më i fortë do ta ndihmojë edhe skuadrën e Bajernit. "Është shumë e rëndësishme për ne, por edhe për kampionatin që Dortmundi të jetë i fortë. Sezonin e shkuar ne patëm një luftë shumë të ashpër dhe nuk ishte rastësi që ata u renditën në vend të dytë duke vendosur një rekord pikësh për këtë pozicion", tha sulmuesi 26vjeçar gjatë një interviste për revistën "Sport Bild". "Për Bajernin, një Dortmund më i fortë është një nxitje më shumë, sepse kështu do ta na jepte më tepër kënaqësi
mundja e tyre". Pavarësisht shpenzimeve rekord të bosit Hans-Joakim Vacke, nga Ruhri janë larguar lojtarë të rëndësishëm si kapiteni Mats Humels te Bajerni, Ilkai Gyndogan te Mançester Siti dhe Henrik Mkhitarjan te Mançester Junajtid. Por
Myler nuk beson aspak se kundërshtarët e Bajernit do të jenë më të dobët këtë sezon: "Ata janë lojtarë të rëndësishëm, por Dortmundi ka transferuar shumë lojtarë cilësorë. Unë i rendis ata së bashku me Bajernin, ekipi favorit për të fituar titullin. Pra do të
vazhdojë të jetë e njëjta situatë si në vitet e shkuara. Me një skuadër si nënkampionia e sivjetshme, Dortmundi qëndroi në vend të parë në renditje deri në dimër sezonin e shkuar. Ndërkohë që gjaku i ri në skuadër çliron edhe forca të reja".