Kukësi akord për 4 mijë € në muaj me Osmanin, sot pritet zyrtarizimi
Musolli pranon rinovimin, Shameti e Mici pezull
Kukësi nuk u ndahet lojtarëve të Skënderbeut. Verilindorët kanë gjetur një akord paraprak me qendërmbrojtësin Tefik Osmani dhe dita e sotme mund të jetë ajo finale në të cilën ai të prezantohet si futbollisti më i ri që do t'i shtohet kontingjentit të teknikut Gjoka. Gazeta "Panorama Sport" ka mësuar tratativat mes palëve dhe gjithashtu detaje të kontratës së re për të cilën mungon vetëm firma. Futbollisti i Skënderbeut ka qenë një dëshirë e skuadrës së Kukësit që në fillim të kësaj merkatoje, ndërkohë që duket se pas aventurës europiane drejtuesit e ekipit verilindor kanë arritur që ta bindin lojtarin. Bëhet fjalë për një akord paraprak që është thuajse drejt finalizimit me sukses.
Detajet - Gazeta "Panorama Sport" ka mësuar edhe disa nga detajet e tratativave. Lojtari pritet që të firmosë një kontratë njëvjeçare, në të cilën do të ketë të përfshirë një klauzolë për rinovim edhe për një tjetër sezon. Gjithashtu, mësohet se futbollisti do të përfitojë një pagë fikse prej 4 mijë eurosh në muaj.
Të tjerët - Ndërkohë, drejtuesit e Kukësit kanë përfituar nga festa në dasmën e tij, për t'i paraqitur Musollit një kontratë të re dyvjeçare, të cilën ai pritet ta firmosë sapo të mbërrijë në Shqipëri, që e bën atë lojtarin më jetëgjatë në këtë klub. Për Micin dhe Shametin do të ketë një takim brenda këtyre dy ditëve me presidentin Gjici, përpara se të thuhet fjala e fundit. E njëjta situatë është edhe për Pejiç, por kroati pritet të japë një përgjigje pozitive për numrin një të kuksianëve. Malota është një tjetër çështje, pasi stafi teknik e ka deklaruar jashtë planeve. Gjithsesi, edhe ai do të zhvillojë një bisedë me presidentin e Kukësit, përpara se të vendoset e ardhmja e tij.