Tirana, në “alarm” për sulmin
Bie zyrtarisht pista e senegalezit që luan në Turqi, klubi në negociata me dy afrikanë
Te Tirana ka "alarm" për sulmin. Kur kanë kaluar 10 ditë përgatitje në Zllatibor, ende nuk është gjetur "bomberi" i shumëkërkuar. Ky shqetësim ndihet nga vetë klubi dhe stafi teknik, ndërsa presioni i tifozëve sa vjen dhe shtohet. Në rrjetet sociale ata i kanë mëshuar ndjeshëm kësaj pjese, ndërsa kërkojnë me ngulm që këtë sezon të gjendet me çdo kusht një "makineri" golash. Prej dy vitesh, problemi mbetet i pazgjidhur, ndaj drejtuesit me urgjencë po operojnë në merkato për të gjetur të paktën dy lojtarë goli. Por dështimet e së shkuarës kanë krijuar një lloj stepje te kryeqytetasit, pasi nuk duan që të përsërisnin gabimet e së shkuarës. Burime për "Panorama Sport" zbulojnë se drejtuesit janë në negociata me dy lojtarë afrikanë, megjithatë emrat mbeten një mister më vete. Në fakt, prej kohësh përflitet afrimi i sulmuesve nga ky kontinent, por ende zyrtarizimet mungojnë. Emeka Emerun, sikundër dihet, u "arratis" nga grumbullimi pasi nuk pranoi provën, Selemani Ndikumana pasi priti bardheblutë, vendosi që të firmoste në Katar. Në të tilla kushte, nën urdhrat e Ilir Dajës mbetet vetëm një "pykë" e mirëfilltë, pikërisht Grent Halili, i biri i presidentit. Në tri miqësore që janë zhvilluar,
Tirana e ka gjetur vetëm tri herë rrjetën, pikërisht në të parën ndaj Petrovacit ( ku shënuan Halili, Karabeci dhe Bajrami), ndërsa në dy të tjerat kanë hasur vështirësi para porte. Qëllimi i klubit është që të gjendet të paktën një "bomber" deri javën e ardhshme,
pasi kjo është mënyra e vetme që skuadra të marrë formë dhe afrimi i ri të ketë kohën e nevojshme që të punojë dhe përshtaten me grupin.
Senegalezi - Ditë më parë doli në skenë emri i senegalezit Papa Ndiaje, lojtar që luan në Turqi me Osmnalispor.
Por, huazimi i tij drejt Shqipërisë është i pamundur, jo vetëm se kushton shumë financiarisht, por mbi të gjitha për faktin se llogaritet si titullar nga skuadra turke. Pra, ky emër bie zyrtarisht si opsion, duke i detyruar bardheblutë që të shohin pista të tjera.