Luftëtari afron mesfushorin e Kombëtares së Angolës
Luftëtari ka bërë lëvizjen e parë të bujshme në merkato. Klubi ka siguruar afrimin e një futbollisti cilësor, i cili pritet të bëjë diferencën për objektivat sezonalë të gjirokastritëve në Superiore. Burime të sigurta pranë bluzinjve për "Panorama Sport" kanë zbuluar dje se Silas Daniel Satonho ka mbërritur në Gjirokastër. Mesfushori me tipare ofensive është pjesë e Kombëtares së Angolës, me të cilën është grumbulluar rregullisht gjatë kohëve të fundit. Ai është 26 vjeç dhe menjëherë ka kryer vizitat mjekësore në një nga klinikat e qytetit të Gjirokastrës. Fill pasi të dalin edhe përgjigjet, afrikani do të hedhë firmën mbi kontratën. Sipas drejtuesve gjirokastritë, ky do të jetë një nga futbollistët më cilësorë të
Kategorisë Superiore në këtë sezon, ndaj edhe firma në kontratën e tij do të jetë jo vetëm për edicionin
2016-2017, por edhe me të drejtën e rinovimit të saj edhe për sezonin pasardhës. Futbollisti pritet të përfundojë të gjitha procedurat burokratike të regjistrimit me klubin e ri dhe më pas do të udhëtojë drejt Verias në Greqi, ku gjirokastritët po zhvillojnë aktualisht fazën përgatitore. Santonho nuk do të jetë përforcimi i vetëm që klubi ka projektuar për ekipin e drejtuar nga Milinkoviç. Presidenti i klubit, Grigor Tavo, falë kontakteve me menaxherë të ndryshëm, ka planifikuar që në ditët në vazhdim të vërë në dispozicion të trajnerit edhe 3-4 lojtarë të tjerë të huaj, të cilët do ta ndihmojnë Luftëtarin që të mos diskutojë qëndrimin në Superiore në këtë sezon.
Përgatitësi dhe stadiumi - Nga burime jo zyrtare mësohet se ekipit bluzi në këto ditë përgatitje në Nausa i është bashkuar edhe një përgatitës atletik. Megjithatë, kur Luftëtarit i duhen edhe gati 5-6 ditë nga përfundimi i përgatitores, klubi ka siguruar një miqësore me Kërkyrën, për të krijuar një ide më të qartë për gjendjen e grupit. Sakaq, këtë mesjavë pritet të startojnë punimet në stadiumin "Gjirokastra". Imediat është shtrimi i tapetit të ri, ndërsa temperaturat e larta duket se po mbajnë peng nisjen e punës. Tomorr Shehu