Kinezët ikin sërish, Galiani debate me aksionerët e rinj
Milani është përsëri në udhëkryq. Kinezët kanë kërkuar kohë për të finalizuar akordin, ndërsa Adriano Galiani duket se do të largohet përfundimisht nga "Djalli" sapo të futen investitorët aziatikë. Kohë - Të gjitha palët thonë se janë dakord mbi gjithçka, por firmën nuk e hedhin. Mediat italiane kanë zbuluar dje se grupet kineze të interesuara për 70% të aksioneve të Milanit i kanë kërkuar Silvio Berluskonit edhe 7-10 ditë të tjera kohë për firmën. Siç dihet, "Kavalieri" prej kohësh ka treguar vullnetin e tij për të shitur shumicën e skuadrës së tij të zemrës, por në momentin që pritet firma e famshme, diçka nuk shkon dhe gjithçka shtyhet për një tjetër datë. Edhe këtë herë është përsëritur i njëjti skenar dhe kinezët kanë bërë me dije se do të udhëtojnë drejt Milanos pas pak ditësh.
Prapaskena - Ditën e djeshme "Il Giornale" publikoi një lajm, sipas të cilit Adriano Galiani kurrë nuk ishte pajtuar me vendimet e Nikolas Gançikofit. Administratori i deleguar i Milanit, sapo kishte arritur marrëveshjen me Arbeloan, pa teksa menaxheri, i cili bashkëpunon me Sal Galatioton, shkatërroi gjithçka, pasi nuk konsideronin spanjollin si të duhurin për "djallin" e ri. Për Galianin, kjo ishte një "deja vu", pasi një vit më parë iu desh që të merrej Barbara Berluskonin, e cila tentoi që ta pengonte në
shumë tratativa. Sipas së përditshmes në fjalë, aty ku punon njëri prej gazetarëve që historikisht ka ndjekur Milanin (flasim për Franko Ordinen), Gançikof ka shkuar deri aty sa të kontaktojë personalisht menaxherët e lojtarëve që i interesojnë
(Kaseres) duke krijuar kështu një dualizëm në shoqëri. Pas zhvillimeve të fundit, Adriano Galiani ka kuptuar se në të ardhmen nuk do të ketë më vend te Milani, edhe pse pak muaj më parë u tha se kinezët do ta bënin zëvendëspresident.