Ançeloti: Hernandezin e dua shumë, por më mjafton Robert Levandovski
KarloAnçeloti rikonfirmoi nga Çikago se merkatoja e Bajernit është mbyllur dhe i mbylli derën edhe një transferimi të mundshëm të Havier Hernandezit, si një alternativë për të qenë zëvendësuesi i Robert Levandovskit në stol. Karl-Hainc Rumenige ka firmosur me Renato Sançesin dhe Mats Humelsin deri në këto momente, por edhe pse janë larguar shumë lojtarë, teknikut italian i mjafton skuadra që ka në dispozicion, të cilën të plotë për herë të parë që kur është ulur në stolin e Bajernit do ta ketë më datë 5 gusht. "Unë e dua shumë Chicharito-n", tha Ançeloti për sulmuesin meksikan, të cilin ai e pati te Reali i Madridit gjatë sezonit 2014/15. "Ai është një profesionist shumë serioz dhe unë kam pasur një marrëdhënie shumë të mirë me të te Reali. Por tani ai është një lojtar i Bajer Leverkusenit dhe do të jetë një kundërshtar shumë i fortë sezonin e ardhshëm. Sepse unë duhet ta llogaris atë si rival dhe në asnjë formë tjetër. Siç e kam thënë, skuadra është e fortë kështu siç është. Ne jemi të dubluar në çdo pozicion. Unë jam shumë i kënaqur me lojtarët që kam. Levandovskin e kam parë në shumë ndeshje. Ai është një sulmues që garanton shumë gola, është një sulmues i shkëlqyer. Kemi shumë cilësi dhe nuk kemi nevojë të blejmë futbollistë të tjerë sepse kemi një skuadër të fortë kështu siç e kemi", tha Ançeloti. 57vjeçari dha edhe një lajm të mirë për rikthimin e Holger Badshtuberit. "Me gjendjen fizike që ka mund të përballojë 30-40 minuta lojë dhe nuk ekziston më asnjë rrezik që të ridëmtohet. Rreziku ka kaluar tashmë".