Luftëtari sot drejt Durrësit, Milinkoviç "teston" Superioren
ur duhen dhe dy javë nga starti i sezonit 2016- 2017, Luftëtari bëhet gati për miqësoren e gjashtë. Këtë herë kundërshtar do të kenë Teutën dhe ndeshja do të luhet në "Niko Dovana" gjatë pasdites. Ky test do i shërbejë trajnerit Mladen Milinkoviç për të njohur më nga afër nivelin e ekipeve të Superiores, por pse jo edhe për të "fiksuar" formacionin e kontingjentit që ka deri më tani në dispozicion. "Serioziteti dhe përkushtimi i futbollistëve në stërvitje, si dhe në miqësoret e zhvilluara na bën gati për startin e kampionatit. Lojtarët kanë marrë ngarkesat e duhura fizike, si dhe kanë treguar përmirësim të të gjithë komponentëve nga njëra miqësore në tjetrën", pat thënë pak ditë më parë serbi. Sakaq, për Luftëtarin merkato mbetet e hapur, kur duhet dhe një javë nga ulja e siparit të saj. Aktualisht pjesë e ekipit janë bërë Alemao Zdrava, Shkëlzen Ruci, Silas Daniel Satonho, Kristal Abazaj, Julian Lluka, Emiljano Shehu dhe Silvio Zogaj. Gjithsesi, klubi do të qëndrojë i qetë. Pritet që këto ditë ekipit t'i bashkohen futbollistët e shumëpërfolur, mes të cilëve një qendërmbrojtës, një mesfushor organizator dhe dy sulmues, që të gjithë të huaj. Përforcimi i skuadrës gjirokastrite me këta futbollistë do ta bënte edhe më të fortë Luftëtarin për të përmbushur misionin e vetëm të tij, qëndrimin në Kategorinë Superiore.
Po ecin me ritme të shpejta punimet për zëvendësimin e tapetit të vjetër me të ri. Gjithçka është fokusuar tashmë në shtrimin e rërës dhe rulimin e saj, me qëllim ngjeshjen sa më shumë me tabanin ekzistues. Menjëherë pas përfundimit të këtij procesi delikat, do të nisë dhe shtrimi i tapetit të ri. Të gjitha punimet deri në fazën e të qepurit gati për shtrimin e tapetit janë investime të Bashkisë së Gjirokastrës, ndërkohë që fusha do të shtrohet është kontribut i FSHF- së. Pavarësisht ecurisë së kënaqshme të punimeve, Luftëtarit do t'i duhet të luajë 4- 5 përballjet e para në fushë asnjanëse, ndoshta në Ballsh apo Fier.