Nica, i kënaqur: Jemi gati!
“Gjatë kësaj jave do të zhvillojmë dy miqësore me ekipe të Superiores”
Pas kthimit nga Stru ga, Besëlidhja nuk i ka ndërprerë përgatitjet për sezonin e ri, pasi nën drejtimin e trajnerit Nica ekipi ka vazhduar stërvitjen në Lezhë. Në një prononcim për "Panorama Sport", trajneri i lezhjanëve, Stavri Nica ka bërë me dije se nga skuadra ka edhe largime. "Në përgjithësi jam i kënaqur nga impenjimi që kanë treguar lojtarët që ishin të grumbulluar. Por, nga skuadra janë larguar dy futbollistë me ngjyrë, që kishin ardhur për t'u provuar te Besëlidhja, pasi nuk arritën që ta përballonin ngarkesën stërvitore. E gjithë periudha e qëndrimit atje ishte mjaft e suksesshme, por nuk arritëm që të zhvillonim ndonjë miqësore, kjo për arsye të refuzimit nga skuadrat vendase duke u justifikuar se kishin nisur kampionatin. Grumbullime të tilla janë të nevojshme për skuadra pretendente siç është edhe Besëlidhja, ndaj për këtë u jemi mirënjohës drejtuesve. Me kthimin këtu, skuadra ka nisur rregullisht stërvitjen sipas programit dhe periudha rreth trejavore deri në nisje të sezonit futbollistik do të na shërbejë për të riparuar ato të meta dhe dobësi që kemi evidentuar deri tani", ka thënë Nica.
Axhenda - Trajneri ka bërë me dije gjithashtu edhe axhendën që skuadra do të ndjekë në vendin tonë, deri në fillimin e sezonit të ri futbollistik. "Për këtë javë dëshiroj të luaj dy miqësore, nga ku kundërshtarët më të preferuar janë skuadrat e Superiores, pasi do të kishim një test real që provon punën tonë të deritanishme. Kjo pasi në Strugë ekipi i është nënshtruar një stërvitjeje me ngarkesa maksimale e ndarë në dy seanca ditore, kjo për të marrë ngarkesat maksimale që janë të nevojshme për sezonin e ri futbollistik", ka përfunduar Nica. Besëlidhja edhe për sezonin e ardhshëm do të ketë objektiv kryesor ngjitjen në Superiore dhe për këtë arsye drejtuesit kanë ruajtur boshtin e skuadrës, duke u përforcuar edhe në merkato.