Lushnja mund Tomorin, Turbina e Rrakllit shtang Elbasanin
Sefa dhe Canka shpërdorojnë shumë, ka lojë të fortë dhe përplasje mes lojtarëve
Lushnja i kundër përgjigjet Bylisit, Apolonisë dhe Dinamos. 1-0 në "Roza Haxhiu", në përballjen tradicionale ndaj Tomorit dhe një start perfekt i kampionatit. Sfida nuk u vendos nga dyshja e sulmit Sefa- Canka, që dje shpërdoruan shumë, por nga një gol spektakolar i Endri Maganit, i cili dje debutoi me verdhejeshilët. Një top i larguar nga zona nga miqtë, peqinasi e ka stopuar mirë dhe, më pas, ka goditur fort me të djathtën nga rreth 25 metra duke gjetur trekëndëshin e Kaloshit.
Ndeshja - Lushnja dhe Tomori u përballën që në premierë pas rikthimit të beratasve në Kategorinë e Parë. Gjithsesi, në "Roza Haxhiu" kishte pak spektatorë dhe vapa pati një ndikim të madh. Ndeshja ka nisur me mjaft ekuilibër, por lushnjarët pas 10 minutave të para fitojnë epërsi. Në minutën e 13-të, pas krosit të Cankës, Magani në rrëshqitje e sipër arrin të godasë, por jashtë. Dy minuta më vonë është e njëjta gjë. Magani tenton nga e djathta, Canka kundërpërgjigjet nga krahu tjetër, por topi devijohet dhe humbet kuadratin. Nga këndi topi shkon në kokën e Branicës, i cili është i pavëmendshëm dhe, për pasojë, devijimi mungon. Në mes të pjesës së parë ka një pushim 60sekondësh për t'u freskuar. Më
tej ka shumë "muskuj" dhe kryesori Xhemalaj vë në përdorim kartonët e verdhë. Tomori vjen në minutën e 28-të. Pas një goditjeje dënimi të Mihanit, topi kalon barrikadën, por Spaho i kujdesshëm ka devijuar në korne. Në minutën e 38-të, Mirani nga e majta depërton bukur
dhe sa nuk bashkohet me Spahon, por goditja devijohet në korne. Pjesa e parë mbyllet me një moment goli të lushnjarëve. Kros i Branicës nga e djathta, Sefa "përkëdhel" topin me kokë, por jashtë. Në të 54-ën, Çela kroson për Cankën, por topi largohet nga
zona dhe i shkon Maganit, i cili me një goditje perfekte shënon në të djathtë të Kaloshit. Lushnjarët mund të kishin dyfishuar shumë shpejt me Cankën, katër minuta pas avantazhit, por goditja përballë Kaloshit pritet nga portieri lushnjar. Sharavolli
ishte shumë pak për sulmin dhe mungesa e Kanaparit u ndie shumë. Edhe pse Sinella ndërhyri duke futur në fushë Caushajn, sulmi beratas ishte i dobët. Në fund ka një karton të kuq për Ruçon dhe shtesa është epërsi numerike për Tomorin, pasi nuk ka asgjë.