Moviola e javës së katërt
KORABI - VLLAZNIA 0-0
Gjyqtarë: A.Beqiri, E.Barushi, N.Bregasi (Tiranë)
Rasti flagrant i ndeshjes ka qenë në minutën e 59-të të takimit, kur Sebino Plaku kontrollon një top brenda zonës së Vllaznisë. Sulmuesi markohet ashpër nga Gurishta, i cili, në pamundësi për të gjuajtur topin, godet këmbën e futbollistit kundërshtar dhe e rrëzon në tokë, duke shkaktuar 11metërsh. Por, për kryesorin e takimit, Beqirin, i cili ishte pranë aksionit, nuk ka 11-metërsh edhe pse pamjet filmike tregojnë të kundërtën. Ndërsa në minutën e 83-të të ndeshjes, mbrojtësi i Korabit Prençi është ndëshkuar me kartonë të kuq, pasi si lojtar i fundit ka penguar kundërshtarin, duke i hequr mundësinë e shënimit. Kartoni i kuq për të ishte i merituar.
LAÇI - KUKËSI 0-0
Gjyqtarë: A.Koçi, E.Velo, F.Lamaj (Durrës)
Në minutën e 28-të të ndeshjes, Hasani kroson një top në zonën kurbinase nga goditja e dënimit dhe portieri Selmani del në pamje të parë i sigurt, duke kontrolluar sferën, e cila i rrëshqet nga duart. Sulmuesi i Kukësit, Pero Pejiç, kontrollon topin dhe shmanget bukur, por Qaqi nuk e lejon dhe shihet qartë që e mban me të dyja duart duke e hedhur në tokë. Në këtë moment, gjyqtari kryesorAndi Koçi është mbrapa aksionit dhe ka një pamje të qartë të tij, megjithatë ka vendosur të mos akordojë 11-metërsh, edhe pse ai është i rregullt. Në këtë ndeshje ka edhe një moment tjetër të diskutueshëm, në minutën e 13-të, kur Akuino bën një ndërhyrje ndaj Hasanit, duke e ngritur takën mbi kokën e tij dhe gjyqtari Koçi me të drejtë e ndëshkon me karton të verdhë.
SKËNDERBEU - LUFTËTARI 1-0
Gjyqtarë: K.Cjapi, I.Tartati, O.Grabova (Fier)
Në Korçë është luajtur një ndeshje relativisht e qetë sa u takon rasteve të moviolës. Nuk ka pasur pothuajse asnjë rast për t'u diskutuar dhe gjyqtarët kanë marrë kryesisht vendime të drejta.
FLAMURTARI - TEUTA 0-0
Gjyqtarë: E.Hamiti, R.Çokaj, P.Simoni (Lezhë)
Treshja e arbitrave në ndeshjen e luajtur në Vlorë nuk ka pasur shumë punë, pasi edhe rastet e diskutueshme kanë munguar, me përjashtim të kartonit të kuq të Veliut, në minutën e 92-të të ndeshjes. Mbrojtësi ka bërë një ndërhyrje të rëndë dhe ndëshkimi i tij ka qenë i drejtë.
PARTIZANI - TIRANA 0-0
Gjyqtarë: E.Jorgji (Elbasan), E.Doda, R.Avdo (Tiranë)/ pas porte: O.Sokoli (Tiranë), B.Ziri (Fushë-Krujë)
Derbi i kryeqytetit ka prodhuar shumë pak raste të diskutueshme. Në pjesën e parë, Ekuban ka marrë një pasim nga Vila, por anësori ka akorduar pozicion jashtë loje, por në pamjet filmike nuk ka rezultuar i tillë. Në pjesën e dytë, Trashi gjuan në drejtim të portës, por topi ndalet nga Karabeci me shpatull, ndërsa të kuqtë kërkojnë 11-metërsh.Arbitri ka vazhduar lojën dhe vendimi ka qenë i drejtë.