FSHF rikthen Mamurrasin, "çudia" që ndodhi brenda 3 ditësh

Ekipi mamurrzak do të luajë sërish në të Parën

Një lojë "fëmijësh". Vetëm në një vend si Shqipëria mund të ndodhë që një klub të përjashtohet nga kampionati të mërkurën e kaluar, të mos licencohet nga Komisioni përkatës të shtunën pas vendit vakant që la një klub i tërhequr dhe të hënën ta shohë sërish veten pjesë të garës. Çudirat në futbollin shqiptar nuk kanë fund. Bëhet fjalë për Mamurrasin që do të jetë sërish pjesë e Kategorisë së Parë. Vendimi u mor dje nga Komisioni i Apelit të Licencimit që rrëzoi atë të shkallës së parë të Licencimit që nuk e pranonte Mamurrasin në garë për shkak të borxheve të prapambetura. "Komisioni i Apelit të Licencimit, pasi u njoh me apelimin e KF Adriatik Mamurras, si dhe provat e paraqitura nga ky klub për plotësimin e kriterit financiar të licencimit, vendosi të licencojë KF Adriatik Mamurras për pjesëmarrjen në kampionatin e Kategorisë së Parë të Federatës Shqiptare të Futbollit për sezonin 2016- 2017", thuhej në njoftimin e djeshëm të FSHF-së. Burimet flasin për një shumë të konsiderueshme që kishte klubi karshi FSHFsë të akumuluar ndër vite. Por, se çfarë e ndryshoi si me magji të gjithë këtë situatë brenda tri ditësh nga e shtuna në të hënë, duket shumë e çuditshme. Pa paragjykuar askënd, por duket e habitshme se si drejtuesit e skuadrës u pajtuan me përjashtimin e ekipit të mërkurën, ndërsa dje shlyen milionat që i detyroheshin FSHF- së. Nga ana e vet, Federata nuk ka bërë të ditur asnjë fakt se si ndryshoi e gjithë kjo situatë brenda pak orësh. Si gjithmonë, Federata fsheh gjithçka.