Kaos me stadiumin, vuan Elbasani
Sot sfida e parë e Kupës, ndaj Luftëtarit do të luhet në kompleksin “Shefqet Lamçja”
Elbasani kërkon ta lërë pas humbjen në kampionat në "derbin" me Turbinën dhe të gjejë një "ngushëllim" te Kupa e Shqipërisë. Humbja në javën e parë të kampionatit do të kalojë me një analizë dhe do të kërkohet patjetër kthesa në sfidën e ardhshme. Megjithatë, para kampionatit është edhe Kupa dhe pikërisht ditën e sotme skuadra do të luajë sfidën e parë të turit të parë përballë Luftëtarit në Superiore. Ndeshja është programuar në Elbasan, por dita e djeshme ka qenë një kaos i vërtetë për të gjetur një fushë për këtë sfidë. Stadiumi
Verdheblutë luajtën të hënën dhe u takoi vetëm një ditë pushim përpara përballjes së sotme. Jo vetëm që nuk pati një shtyrje të ndeshjes së Kupës, por një tjetër problem është stadiumi se ku do të luhet. Sfida nuk mund të luhej sërish në "Elbasan Arena", për shkak se në këtë impiant u luajtën dy ndeshje radhazi, Partizani-Tirana të dielën dhe Elbasani-Sopoti të hënën. Dhe do të ishte shkatërruese për tapetin që të
luheshin tri ndeshje brenda katër ditësh. Aktualisht është korrur bari dhe po menaxhohet situata me fushën. Në këtë mënyrë, është vendosur që ndeshja të luhet në kompleksin "Shefqet Lamçja", aty ku verdheblutë kryejnë stërvitje çdo ditë. Për momentin,
kjo ishte zgjidhja më e mirë, duke qenë se impianti kryesor i qytetit është duke u mirëmbajtur. Ndonëse elbasanasit nuk kanë një objektiv real për Kupën, pritet që ta marrin seriozisht përballjen me gjirokastritët, pasi në bazë të kalendarit mund
të përballen me bardheblutë e Tiranës në turin tjetër. Rivaliteti i një dekade më parë midis dy tifozërive mund të bëjë që në stadium të rikthehen edhe ultrasit elbasanas, duke bërë në këtë mënyrë që të "shkrihen" akujt edhe me klubin. verdheblu.