Besëlidhja shpalos objektivat për Kupën
Besëlidhja, nën drejtimin teknik të trajnerit Stavri Nica, po vijon stërvitjen jo vetëm për llogari të javës së dytë, por edhe për Kupën e Shqipërisë. Pas fitores së të shtunës ndaj Besës në transfertë, të gjithë këtu në Lezhë janë të gëzuar. Stafi teknik po punon për të meremetuar ato pika ku u vërejtën dobësi të shtunën ndaj kavajasve. Drejtori teknik Alban Bruka, gjatë një prononcimi për "Panorama Sport", flet për ecurinë e skuadrës në start dhe për objektivat e tyre. "Fitorja e së shtunës në Kavajë ndaj Besës ishte starti më i mirë i mundshëm për një skuadër pretendente si Besëlidhja, pasi tashmë jemi të karikuar edhe psikologjikisht për të vijuar rrugën tonë. Tani jemi të përqendruar te ndeshja për llogari të Kupës së Shqipërisë, ndaj Erzenit, një ndeshje që e kemi vlerësuar maksimalisht, pasi jo vetëm që do të kërkojmë të ecim sa më shumë në Kupë, por këtë skuadër e kemi rivale edhe në ndeshjet e kampionatit. Skuadra është e karikuar maksimalisht dhe tani presim të qetë takimin e Kupës së Shqipërisë", thotë Bruka. Preng Gjikola