Kampionati i çudirave, në jug ka një garë “big”-ësh
Akuza për korrupsion, lojë e FSHF-së me klubet
Një kampionat që nis me dy javë vonesë, skandale me klubet që në ditën e parë, akuza për korrupsion ndaj gjyqtarëve dhe pak tifozë. Kjo nuk është Kategoria e Parë që presin të gjithë, kampionati i dytë më i rëndësishëm në Shqipëri, por me shumë diferencë nga Superiorja. Gara u prish që në ditën e parë. Partizani B u tërhoq nga kampionati vetëm tri orë përpara sfidës së parë që do të çelte garën. E padëgjuar më parë! Një çështje që mbeti enigmë dhe arsyet e vërteta dhe jo ato sa për të kaluar radhën, nuk u thanë asnjëherë. Rikthimi i Mamurrasit me tri vendime të ndryshme brenda një jave është një tjetër rekord i kësaj federate që eksperimenton me garën njëlloj si me recetat e gatimit. Analiza
Në Grupin A, dy prej tre pretendenteve që synojnë ngjitjen në Superiore, Besëlidhja dhe Kamza, e kanë nisur me fitore. Të parët i ka nderuar një guineas në transfertën e Kavajës ndaj Besës, në një kohë që rasti i humbur nga verdhezinjtë në fundin e lojës, me siguri që tashmë ka hyrë në videot përmbledhëse të humorit sportiv ku lojtarët nuk shënojnë as me portën e boshatisur. Gjithsesi, lezhjanët i kënaq vetëm 3-pikëshi. Kamza ia del në një fushë të vështirë si ajo e Shënkollit. Skuadra debutuese, e cila përfaqëson komunën e njohur në të gjithë Shqipërinë për burgun e famshëm që ndodhet aty, nuk arriti të shmangte humbjen. Një lojë e fortë dhe shumë karakter, por në fund ka vetëm zhgënjim. Ndërsa, kamzalinjtë kanë bërë humor edhe me fushën. "Ishte aq e vogël sa na dukej sikur luanim 'kriket'", diskutonin mes tyre lojtarët kamzali. Burreli e nis shumë mirë dhe në takimin ndaj Ilirisë i mjaftojnë vetëm 45 minuta. Tërbuni i rikthyer në të Parën, e fillon sezonin me vetëm një pikë. Nëse Kiri nuk do të gabonte nga pika e bardhë në minutat e fundit, gjërat do të ishin ndryshe ndaj Kastriotit. Në Grupin A, përplasjet e rëndësishme do të jenë të pashmangshme thuajse çdo javë. Bylisi, Elbasani, Tomori, Dinamo, Apolonia, Lushnja apo edhe Pogradeci kanë krijuar një kampionat më vete në Grupin e Jugut. Skuadra që synojnë elitën dhe premtojnë përballje të zjarrta në vazhdim. Lushnja- Tomori ishte përballja "big" që iu rikthye kampionatit. Një eurogol i Endri Maganit vendosi sfidën duke i dhënë 3 pikë Lushnjës. Ndërsa, beratasve u duhet ende punë për t'u ambientuar me Kategorinë e Parë, ku munguan për një vit. Ajo që i mungoi kësaj sfide ishin tifozët, shumë të paktë në numër. Apolonia mund Sopotin në Fushë- Krujë. Uzuni është heroi i fierakëve me dopietë, ndërsa librazhdasit akuzojnë ashpër gjyqtarin kryesor Elidon Halo dhe një prej anësorëve. Akuzat ndaj tyre janë për korrupsion në bashkëpunim me fierakët për të dëmtuar Sopotin. Akuza "të çmendura" që në start. Për ironi, Elbasani, që kishte vetëm disa ditë që u shit si klub te një kompani angleze për rreth 1 milion euro, u mund në "derbi" nga Turbina 1-0. Bylis i drejtuar nga Julian Ahmataj e nis me fitore kampionatin duke mos gabuar në fushën e vet përballë Pogradecit. Ndërsa, Dinamo jep sinjale se do të jetë ndryshe nga një vit më parë. Një ekip, ku ndërthuren veteranët me të rinjtë, përballë Shkumbinit fiton lehtësisht 2-0.