Zbardhet plani, lojtarë anglezë për Elbasanin
Priten disa lojtarë të rinj britanikë në janar, ja synimet
Elbasani po kalon një periudhë tranzicio ni, teksa për momentin të gjithë në qytet janë duke pritur pronarët e rinj për të nisur nga puna. Aktualisht skuadra është duke u menaxhuar nga Bashkia e Elbasanit dhe, për fat të keq, rezultatet nuk kanë qenë brenda pritshmërive të fillimsezonit. Elbasanasit janë në vendet e fundit në klasifikim, në kuotën e pesë pikëve, dhjetë më pak se vendi i parë që mbahet nga Lushnja. Megjithatë, shpresat janë që nga ndeshja në ndeshje të vijë edhe ringritja dhe gjatë muajit janar, kur të vijnë investitorët e rinj, verdheblutë të mos jenë larg me pikë nga rivalët që synojnë Superligën. Plani i anglezëve
Para pak ditësh ishte presidenti aktual i Elbasanit, Ar- ben Laze, i cili, në një prononcim për "Panorama Sport", pohoi se pronarët e rinj në muajin janar kanë premtuar investime të mëdha në blerjen e futbollistëve cilësorë. Gazeta zbulon se anglezët duan që të përforcojnë skuadrën me futbollistë të huaj, që militojnë në kampionatin anglez dhe që në futbollin shqiptar pritet të sjellin një tjetër cilësi. Për momentin nuk bëhen të ditur emrat, por duke qenë se vetë kompania "Level Up Sa" merret kryesisht me menaxhimin në këtë sektor, nuk do të jetë aspak problem afrimi i futbollistëve. Madje, edhe para se të niste ky edicion, ishte gati afrimi i disa lojtarëve, por për shkak se nuk i morën dot "çelësat" e klubit më herët, nuk ndërmorën një hap të tillë. Nga burime të besueshme të gazetës pranë Bashkisë së Elbasanit, kjo kompani që ka blerë në masën 100% aksionet e klubit verdheblu, ka lidhje të ngushta me gjigantët e futbollit europian dhe botëror, Mançester Junaited. Ndaj, mundësia më e madhe është që të afrojnë lojtarë nga ky klub gjigant, nga ekipet e moshave apo tek ekipe të tjera që mund të jenë dërguar lojtarë të huazuar. Për momentin, bëhet fjalë thjesht për zëra merkatoje, por duket sikur bashkëpunimi me "djajtë e kuq" është një mundësi reale. Pronarët e rinj kanë mbërritur me synime të mëdha në futbollin shqiptar, ku kanë premtuar ngritjen e një klubi model dhe konkurrues në të ardhmen dhe në arenën ndërkombëtare.