Titulli në Angli, ja kush mund të shpallet kampion

Gjashtë skuadra që duan të zbresin nga froni Leiçesterin

Kampionati anglez vazhdon të ruajë statusin e më rivalizuesit në Europë dhe renditja e tregon qartë një gjë të tillë. Vendi i parë dhe ai i pestë kanë vetëm një pikë diferencë mes tyre. Njëkohësisht janë të paktën pesë ekipe që synojnë titullin kampion që në start, duke shpenzuar shifra marramendëse për të realizuar këtë objektiv. Pas nëntë javëve të para, "Daily Mail" ka analizuar edhe shanset e ekipeve për të qenë triumfues në fund të edicionit... Mançester Siti

Pse mund ta fitojë - Ata janë në krye, pavarësisht se nuk kanë fituar asnjë nga pesë ndeshjet e fundit në të gjitha kompeticionet. Janë të parët, sepse kishin fituar plot dhjetë takime radhazi. Siti ka një ekip të mbushur me yje dhe Pep Guardiola ka gjithashtu mjaftueshëm potencial menaxhues të skuadrave apo futbollistëve të tillë.

Pse nuk mund ta fitojë - Guardiola mundohet t'u theksojë gjithnjë gazetarëve se është vetëm në fillimin e projektit të tij dhe kjo nënkupton se ka nevojë për kohë. Gjithashtu ka këmbëngulur se nuk heq dorë nga filozofia e tij e lojës, pavarësisht se nuk ka rezultuar gjithnjë e suksesshme në këtë edicion. Pikëpyetjet lidhen pikërisht me këtë element, a do shpallet Mançesteri kampion me këtë stil loje?! Arsenali

Pse mund ta fitojë - Aleksis Sançez dhe Mesut Ozil janë dy arsye pse Arsenali është pretendent për titullin. Të dy kanë pasur një kontribut shumë të madh në shënimin e golave, në mungesë të Oliver Zhiru dhe Dani Uelbek. Njëkohësisht, kanë arritur të bindin edhe në prapavijë, ku dyshja Shkodran Mustafi-Lorent Koshielni ka qenë mjaft efikase.

Pse nuk mund ta fitojë - Ka shumë luhatje. Të barazosh në shtëpi 0- 0 me Midëllsbropun, nuk është një rezultat prej pretendenti titulli. Madje, me fat i shpëtuan edhe humbjes. Arsenali shihet prej specialistëve si një prej katër ekipeve të para, por Venger ende nuk ka bindur se ky mund të jetë viti që do ngrejë trofeun e kampionit pas 12 vitesh.

Liverpuli

Pse mund ta fitojë - Jurgen

Klop ka vënë firmën e tij në lojën dhe mentalitetin e skuadrës. Këtë sezon Liverpuli është befasues, energjik, i uritur për gola dhe transmeton një pasion mbresëlënës për futbollin. Shumë pak ekipe mund të jenë kaq tërheqëse në Europë.

Pse nuk mund ta fitojë - Të humbasësh kundër Bërnlejt është një rezultat shqetësues, nëse kërkon që të lësh pas vetes të gjitha skuadrat e tjera të kampionatit. Barazimi pa gola ndaj Mançester Junajtid është i vetmi takim që nuk pësuan gol dhe ky

nuk është tregues pozitiv sa i përket punës që bën mbrojtja.

Çelsi

Pse mund ta fitojë - Moduli 3- 4- 3 i Antonio Kontes, me Markos Alonson dhe Viktor Moses nga krahët nuk dukej se do funksiononte. Por, ajo fitore ndaj Mançester Junajtid tregoi se janë gati të ecin me ritëm kampioni dhe të poshtërojnë rivalët më të vështirë. Ishte një takim ku treguar autoritet në mënyrën e të luajturit, çka e gjen rrallë tek ekipet e tjera.

Pse nuk mund ta fitojë -

Kjo skuadër është pothuajse e njëjta me atë që kishte Zhoze Murinjo sezonin e kaluar dhe dështoi. Konte ka fituar tetë tituj kampionë në Itali, pesë si lojtar dhe tre si trajner. Por, të mendosh që do rikthejë trofeun te Çelsi që në eksperiencën e tij të parë në Angli duket sikur i kërkon më shumë sesa duhet.

Totenhem

Pse mund ta fitojë - Janë e vetmja skuadër që nuk ka njohur akoma humbje në kampionat dhe vitin e kaluar treguan se janë të aftë të triumfojnë në Angli, duke qenë të vetmit rivalë të Leiçesterit në garën për vendin e parë. Sivjet, kanë të njëjtin ekip dhe më tepër eksperiencë...

Pse nuk mund ta fitojë - Mauricio Poketino njihet si një trajner që bën stërvitje të rënda, por a do ia dalë si duhet të menaxhojë kalendarin?

Përveç kampionatit, tashmë duhet të mendojnë edhe për Ligën e Kampioneve dhe ky shihet si një element penalizues për një skuadër që nuk e ka pasur çdo vit një eksperiencë të tillë. Mançester Junajtid

Pse mund ta fitojë - Shifra prej 150 milionë sterlinash që kanë shpenzuar në merkato dhe futbollistë si Pol Pogba janë një arsye për t'u marrë seriozisht në konsideratë. Kanë një trajner me eksperiencë të madhe fituese në Angli si Murinjo, një portier që jep garanci si De Gea dhe një ekip të uritur për të qenë kampion.

Pse nuk mund ta fitojë - Gjërat nuk po shkojnë si pritej. Pogba nuk është ambientuar akoma si duhet, Ibrahomoviç nuk po gjen dot rrugën e rrjetës dhe Murinjo po humbet qetësinë, siç ndodhi pas humbjes turpëruese ndaj Çelsit.