"Europian 2018", Resuli: Nëse organizohemi, jemi të rrezikshëm
Pasi është njohur me verdiktin e shortit të Eliminatoreve të Kampionatit Europian të vitit 2017-2018, trajneri i ekipit kombëtar të futsallës Erind Resuli është shprehur për faqen zyrtare të FSHF-së. Në intervistën e tij, trajneri kuqezi flet për kundërshtarët në grupin D eliminator dhe për paraqitjen që pret nga skuadra e tij.
Cila është përshtypja juaj për këtë short?
Është e tepërt të them, por për një skuadër si Shqipëria shorti gjithmonë do të jetë i vështirë.
Në këto eliminatore ne do të luajmë kundër skuadrave të Anglisë, Bullgarisë dhe Maltës. Të tria kanë specifikat e tyre dhe paraqesin vështirësi në disa plane.
Çfarë duhet të bëjë Shqipëria për t'u paraqitur sa më mirë në këto eliminatore?
S'ka ndonjë gjë të paditur në këtë mes. Ne duhet të japim maksimumin në fushën e lojës. Pastaj kuptohet për çdo ndeshje do të ketë detyra specifike, të cilat duhet t'i zbatojmë me rigorozitet.
Kur luajmë të organizuar jemi vërtet të rrezikshëm. Por këtë duhet ta bëjmë në vijueshmëri, prandaj kërkoj sa më shumë përqendrim nga skuadra.
A është e privilegjuar Bullgaria meqenëse ndeshjet e turneut për grupin D eliminator zhvillohen në këtë vend?
Mendoj se është një përqindje e vogël që i favorizon vendasit, por gjërat luhen në fushën e lojës dhe fakti se ata luajnë në shtëpi nuk do të sjellë ndonjë ndryshim të madh. Mendoj se lufta do të përqendrohet mes Anglisë, Bullgarisë dhe Shqipërisë.
Cila është gjendja e skuadrës në momentin që po flasim? Unë mund t'ju garantoj që skuadra ka ardhur duke u rritur dhe përmirësuar në disa drejtime. Ne do të kryejmë edhe një grumbullim për t'u kolauduar sa më mirë dhe për të qenë gati për këto eliminatore.