Fondi i UEFA-s, FSHF: Partizani ka marrë 80 mijë € paradhënie
Institucioni i futbollit: Ja si ua kemi shpërndarë paratë klubeve
Në mesditën e djeshme, salla e mbledhjeve të Komitetit Ekzekutiv të Federatës Shqiptare të Futbollit është vënë në funksion të një komunikimi me mediat nga institucioni i futbollit. Tema e takimit ka qenë informacioni në lidhje me Fondin e Solidaritetit, ku Kejdi Tomorri, shefi i Licencimeve në Federatën Shqiptare të Futbollit, ka shpjeguar se si është shpërndarë ky fond ndër vite.
"Kemi edhe një tabelë pak a shumë me ekipet dhe mënyrën e shpërndarjes së 'Fondit të Solidaritetit' për to. Ne kemi të dhëna të detajuara me të gjitha ekipet për ndërtimet në infrastrukturë, investimeve nga ana jonë dhe të lekëve që kanë marrë klubet. Pak a shumë, do të flasim për një vlerë të përafërt duke nisur nga sezoni 2002- 2003 deri në sezonin paraardhës. Sepse dihet që në këtë sezon akoma nuk është bërë shpërndarja e Fondit të Solidaritetit. Vlera ka qenë rreth 2 milionë e 865 mijë euro, nga të cilat klubet kanë përfituar në formë asistence ose grante për investimet e tyre shifrën prej 357 mijë eurosh dhe duke bashkuar një shifër prej 664 mijë eurosh, të cilat klubet i kanë marrë lekë kesh, shkon në rreth 981 mijë euro, para të cilat klubet i kanë përfituar në mënyrë direkte. Pjesa tjetër rreth 1.8 milionë euro, është bashkuar ndër vite në projektet 'Hat Trick 1' (që ka pasur vlerën në rreth 1 milion franga zvicerane), 'Hat Trick 2' (që ka pasur një vlerë rreth 2.5 milionë euro, por që u shtua duke u futur këto fonde) dhe projekti 'Hat trik 3'. Pra, pjesa prej 1.8 milionë euro ka kaluar në bashkinvestime ose bashkëfinancime në zhvillimin e futbollit të të rinjve, kryesisht në infrastrukturë. Kjo është pak a shumë historia", ka deklaruar Tomorri për t'u lënë kohë pyetjeve të gazetarëve të pranishëm.
Pas interesimit të "Panorama Sport" nëse u është paraqitur klubeve ideja e projektit për të marrë Fondin e Solidaritetit (duke qenë se UEFA e ka paracaktuar shprehimisht federata e ka detyrim njoftimin e klubeve për këtë fond, i cili jepet vetëm pas një projekti të dorëzuar në FSHF dhe nuk mund të ndryshohet destinacioni), si dhe si ka mundësi që një fond i tillë është bashkuar me të tjera investime, Tomorri është përgjigjur:
Ka qenë një vendim i Komitetit Ekzekutiv rreth vitit 2002, i cili ka vënë një pjesë në pagesa kesh dhe pjesën tjetër në bashkinvestime në infrastrukturë. Për më tepër, kjo është bërë duke qenë se vetëm këtë vit ky fond ka një vlerë prej mbi 50 mijë euro për çdo klub, pasi më parë ka qenë vlerë shumë e vogël. Duke nisur nga rreth 18 mijë euro. Meqenëse kanë qenë vlera të tilla, nuk ke se çfarë investimesh të kryesh për futbollin e të rinjve. Për më tepër, duke e marrë të mirëqenë se për një fushë me bar artificial duhen rreth 150-180 mijë euro, apo për një me bar natyral, vetëm pjesa e fushës është mbi 80 mijë euro. Kjo është arsyeja
pse i kemi bashkuar me fondet tona dhe kanë kaluar për këto klube.
Për këtë që sapo thatë që bëhet fjalë për fonde të vogla, nuk mund të shkonin këto shuma parash për ekipet e fëmijëve që të mos paguajnë prindërit e tyre?
Është fond që shkon vetëm për zhvillimin e infrastrukturës te fëmijët.
A është e ligjshme kjo gjë që ju t'i jepni fonde paradhënie me idenë që UEFA mund t'i japë fondet më vonë do të keni mundësinë që t'ua merrni klubeve?
Fondi i Solidaritetit është
një fond vjetor i përcaktuar nga UEFA dhe ne kemi dijeni që do të jetë i përvitshëm.
Është e drejtë kjo?
Për të ndihmuar klubet, patjetër që po!
A ka fonde të tjera që jepen paradhënie?
Në dijeninë time, jo. Unë këtu flas për pjesën e investimeve dhe Fondin e Solidaritetit. Edhe në rastin e Partizanit, ka sjellë projekte për fushat dhe ka kërkuar fonde. Ne ia kemi dhënë atë pagesë për një projekt, duke ia mbajtur më pas.
A është në dijeni UEFA për të gjitha veprimet dhe a pasqyrohet në kontrollet e saj?
Përgjigjet Tritan Kokona: Për këtë mund të të përgjigjem edhe unë, sepse është fare e thjeshtë. Çdo veprim financiar i FSHF-së është i audituar nga dy kompani, një ndërkombëtare dhe një "Deloitte Touche". Të gjitha të dhënat financiare, përfshi edhe Fondin e Solidaritetit, ju i keni në materialet e Asamblesë. Çdo qindarkë që hyn edhe del nga federata, është e dokumentuar. Nuk mund të çedosh te kjo pjesë. Patjetër që në fazën e parë, duke qenë se sot është rreth 54 mijë euro me të cilat mund të bësh një investim serioz për moshat, ndërkohë që
me 15 mijë euro, besoj se ka qenë e pamundur. Në marrëveshje me klubet që vështirësitë i kanë pasur të mëdha dhe aktualisht infrastruktura ka ndryshuar si nata me ditën. Për këtë arsye janë marrë këto vendime në bashkëpunim me klubet. Sa i takon transparencës dhe sa i takon faktit që klubet e dinë apo nuk e dinë, ju garantoj që në çdo material të çdo asambleje vjetore është vënë në dispozicion të të gjithëve. Ka një transparencë, bashkëpunim dhe është bërë një punë me të gjithë këtë (Fondin e Solidaritetit), e cila është një pjesë shumë e vogël e in-
vestimeve që ka bërë FSHF.
Kjo listë do të vihet në dispozicion?
Të klubeve, po.
Po të mediave?
Jo.
Po për financimet që ka përfituar Teuta?
Në rastin e Teutës, kjo skuadër e ka marrë dy herë Fondin e Solidaritetit. Kur është aplikuar për të gjitha klubet në vitin 2007-2008 dhe 20092010. Në këto dy vitet nuk kanë kaluar si pjesë investimesh, por kesh. Nga vlera 249 mijë euro që i takonin, 55 mijë i ka marrë dhe 185 mijë euro i kanë kaluar për investime. Nga të cilat, kemi
pasur investime të përbashkëta, në një vlerë mbi 570 mijë euro. Prej tyre, 185 mijë euro janë Fondin e Solidaritetit, ndërsa pjesa tjetër mbulohet nga projektet "Hat trik 1" dhe "Hat trik 2", pra nga federata. Keni parasysh që në Durrës kemi bërë dy fusha me bar artificial, fushat e vogla, kemi bërë dy herë stadiumin, ndriçimin e fushave të vogla etj.
Ka pasur një akuzë që për fondin e investimeve është bërë një shpërndarje preferenciale?
Në përgjithësi janë miratuar të gjitha projektet. Duhet të kemi parasysh edhe që fushat
me bar artificial kanë shkuar te qytetet me një numër më të madh banorësh. Kjo, pasi një fushë e tillë mund të përballojë stërvitje për rreth 8-9 orë në ditë.
Mund të na tregoni një rast refuzimi?
Refuzime nuk ka pasur, por kujtoj rastin e skuadrës së Lushnjës që i përcaktuam një fushë me bar artificial dhe patëm probleme me bazamentin. Po ashtu ka qenë edhe rasti i Partizanit në atë kohë, ku hasëm probleme me bazamentin dhe i kaluam në një vend tjetër.
Po për Flamurtarin?
Klubi ka marrë pagesa kesh në sezonin 2003-' 04,
2007-'08 dhe 2009-'10. Më pas ka pasur investime nga "Hat Trik 1" në fushën e tyre dhe pastaj një investim prej rreth 420 mijë eurosh në fusha stërvitore me bar natyral, fusha stërvitore me bar artificial dhe fusha e stadiumit. bëhet fjalë për një total prej rreth 490 mijë euro, nga të cilat 148 janë nga Fondin e Solidaritetit dhe pjesa tjetër është nga projektet "Hat Trik 1" dhe "Hat Trik 2".
Shkumbini, Dinamo dhe Bylisi kanë thënë që nuk kanë asnjë informacion… Çfarë është bërë për Shkumbinin?
Edhe për Shkumbinin është
bërë e njëjta shpërndarje në tri sezonet si klubet e tjera që kanë marrë pagesa kesh në sezonin 2003-' 04, 2007-' 08 dhe 2009-' 10. Gjithashtu i është bërë dy herë fusha dhe një herë është bërë edhe bazamenti i fushës.
Presidenti i Bylisit thotë që "nuk kemi marrë asnjë kacidhe". Si ka mundësi?
Mund t'jua vërtetojmë. Bylisi ka marrë 23 mijë euro në llogarinë bankare më 27.01.2004. Për sezonet 2003'04, 2007-'08 dhe 2009-'10 ka marrë pagesa me transferta bankare nga federata në llogaritë e klubit. Të dhëna që presidenti i Bylisit mund të vijë dhe t'i kërkojë në FSHF.
( Kokona: Megjithatë, rruga më e mirë është që të vijnë në institucion për të pyetur dhe jo të përplasen te mediat. Dokumentet i kanë dhe kanë të gjithë mundësinë për të kontrolluar).
A ju lejohet ndryshimi i destinacionit të këtij fondi sepse dy javë më parë vetë zëdhënësja tha nuk i ndryshohet?
Ne mendojmë që destinacioni nuk është ndryshuar, duke qenë se pjesa më e madhe ka kaluar në fusha me bar artificial, të cilat përdoren gjerësisht tek akademitë.