Moçka pranon kritikat: Presidenti ka të drejtë
Teuta/ Durrsakët nisin stërvitjen pas disfatës me Kukësin
Pas një dite pushim, skuadra e Teutës u është rikthyer përgatitjeve për ndeshjen e radhës, që do të luajë në transfertë ndaj Partizanit, e cila parashikohet një përballje mjaft e vështirë. Edhe pse humbja me Kukësin nuk është pritur aspak mirë, trajneri Magani nuk ka folur për këtë temë me lojtarët e tij, duke qenë se sot do të bëjë një analizë të detajuar. Durrsakët ishin në avantazh në fillimin e pjesës së dytë, por në harkun kohor të dhjetë minutave të fundit të ndeshjes pësuan dy gola të shpejtë. Por, situata duket e vështirë për bregdetarët, duke qenë se luajnë takimin e radhës ndaj Partizanit, skuadër e cila javët e fundit nuk ka pasur një ecuri të mirë në kampionat dhe do të kërkojë me çdo kusht që të marrë fitoren. Të kuqtë kanë tri barazime rresht respektivisht ndaj ekipit të Vllaznisë, Luftëtarit, si dhe Skënderbeut. Ndërsa durrsakët kanë dy humbje me Kukësin dhe Tiranën, si dhe një fitore ndaj Laçit. Portieri - Një ditë më parë, në një deklaratë për "Panorama Sport" presidenti Hasanbelliu kritikoi për golat e pësuar portierin Shpëtim Moçka. Ky i fundit, i kontaktuar nga "Panorama Sport", është shprehur se presidenti ka të drejtë dhe kritika është më vend. Portieri gjithashtu premtoi se për presidentin, stafin teknik dhe tifozët do të përpiqet të japë më të mirën e tij, në mbrojtjen e katërkëndëshit të portës. Ndërkohë një lajm i keq vjen për Teutën në prag të ndeshjes ndaj Partizanit. Kapiteni Rustem Hoxha nuk do të jetë gati për këtë takim, për shkak se ka plotësuar numrin e kartonëve të verdhë. Por, do të rikthehet i riu Shkalla. Jeton Rexhmati